Անցնող օրերուն նախ Տոհայի, ապա Գահիրէի մէջ տեղի ունեցան Կազայի մէջ զինադադար յայտարարելու շուրջ բանակցութիւններ, մասնակցութեամբ Քաթարի, Եգիպտոսի, Օմանի, Իսրայէլի եւ Միացեալ Նահանգներու ներկայացուցիչներուն: Քննարկումները սակայն ցարդ չեն յանգած դրական արդիւնքի եւ կը շարունակուին մարտերը: Ամերիկեան Սպիտակ տան բանբեր Ճոն Քիրպի յայտնեց, որ Գահիրէի մէջ խորհրդակցութիւնները կը շարունակուին՝ յաղթահարելու համար տարակարծութիւնները: «Մենք այժմ կը կեդրոնանանք մանրամասնութիւններուն վրայ», ըսաւ Քիրպի՝ աւելցնելով, որ իրենք Իսրայէլին հետ կը համագործակցին՝ զսպելու համար Իրանի հաւանական յարձակումը: Իսկ Համաս շարժումի պատասխանատուներէն Պասէմ Նայիմ յայտնեց, որ իրենք բանակցային որեւէ նիստի մասնակից չեն Գահիրէի մէջ, ժխտելով այդ մասին ամերիկացի պաշտօնատարներու ակնարկը: «Քիրպի պարզապէս կը փորձէ քօղարկել իսրայէլեան ոճիրները եւ ճնշում բանեցնել Դիմադրութեան վրայ», ըսաւ Համասի պատասխանատուն, մերժելով ընդունիլ իսրայէլեան ծանր նախապայմանները:
Իսրայէլեան բանակը իր կարգին յայտարարեց, թէ իսրայէլացի 52-ամեայ գերի Ֆարհան Քատին ազատագրած է Կազայի մէջ «Շապաք»-ի հետ գործադրուած յատուկ գործողութեամբ: Իսրայէլեան օդուժը երէկ ծանրօրէն հարուածեց Այսրյորդանանի Թուլքարմ քաղաքի Նուր Շամս գաղթակայանը, պատճառելով հինգ զոհ:
