Հըզպալլայի զինուորական բարձրաստիճան ղեկավար Ֆուատ Շուքրի ահաբեկումին Հըզպալլայի զուսպ հակադարձութենէն ետք Լիբանանի հարաւային շրջաններուն վիճակը շատ չփոխուեցաւ, այլ հակամարտող կողմերը պարզապէս վերադարձան կշռադատուած փոխադարձ գործողութիւններու դրութեան, որ 7 Հոկտեմբեր 2023-էն ի վեր կը գոյատեւէ հարաւի մէջ: Իսրայէլեան օդուժը երէկ թիրախաւորեց հարաւային Մժէտէլ գիւղին մերձակայ դաշտերը, ինչպէս Նապաթիէ քաղաքին արեւելեան բարձունքները: Առողջապահութեան նախարարութեան արտակարգ իրավիճակներու կեդրոնը հաղորդեց, որ Մժէտէլի եւ Շիհինի դէմ իսրայէլեան հարուածներէն վիրաւորուած է չորս քաղաքացի, որոնցմէ երկու միջին ծանր պարագաները փոխադրուած են հիւանդանոց:
Միացեալ Նահանգներու զինուած ուժերու սպայակոյտի պետ զօրավար Չարլզ Պրաուն յայտնեց, որ Միջին Արեւելքի մէջ առճակատումի մօտալուտ ընդարձակումին հաւանականութիւնը նուազած է՝ Իսրայէլի եւ Հըզպալլայի միջեւ հրաձգութեան փոխանակումէն ետք, որուն անմիջապէս չէ յաջորդած իրավիճակի վտանգաւոր սրում:
Իսկ իսրայէլեան քաղաքական հրապարակին վրայ կը շարունակուին բանավէճերը: Ընդդիմութեան ղեկավար Եաիր Լափիտ նշեց, որ վարչապետ Պենիամին Նեթանիահուի կառավարութիւնը անկարող է վերականգնել հիւսիսային բնակավայրերուն անվտանգութիւնը, մինչ բազմաթիւ տեղահանուածներ կը մնան տուներէն դուրս եւ կը մօտենայ դպրոցական նոր տարեշրջանի բացումը: «Հազարաւոր աշակերտներ չեն գիտեր, թէ երբ եւ ինչպէս դպրոց պիտի վերադառնան եւ ով պիտի հոգայ իրենց», նշեց Լափիտ: Իսկ կառավարութիւնը վաւերացուց իրենց տուները վերադառնալ չկարողացող տեղահանուածներուն փոխհատուցումի տրամադրումը շարունակելու որոշումը:
