Կազայի մէջ զինադադար յայտարարելու հարցով շրջանային բանակցութիւններուն վերջին փուլը եւս ապարդիւն աւարտեցաւ եւ Իսրայէլի ներկայացուցիչը վերադարձաւ տուն: Եգիպտական լրատուամիջոցներ հաղորդեցին, որ Գահիրէի իշխանութիւնները կտրականապէս կը մերժեն Իսրայէլի ներկայութիւնը Կազայի հետ Ռաֆահի սահմանակէտին կամ Ֆիլատելֆիա ճակատին վրայ, աւելցնելով որ եգիպտացի միջնորդները կը փորձեն պաշտպանել թէ՛ Գահիրէի ազգային շահերը, թէ՛ պաղեստինցիներուն իրաւունքները: Համասի քաղաքական գրասենեակի անդամ Իզզէթ Ռաշաք պահանջեց, որ Իսրայէլ յանձնառու մնայ 2 Յուլիսին գոյացած համաձայնութեան, որ հիմնուած է ամերիկացի նախագահ Ճօ Պայտընի ուղերձին եւ ՄԱԿ-ի Ապահովութեան խորհուրդի որոշումներուն վրայ: «Համաս պատրաստ է գործադրելու համաձայնուած կէտերը՝ պահպանելով մեր ժողովուրդին շահերը, վերջ տալու համար իսրայէլեան բռնարարքներուն», ըսաւ Ռաշաք:
Նոյն ծիրին մէջ, Իրանի արտաքին գործերու նախարար Ապպաս Արաքժի Թեհրանի մէջ ընդունեց Քաթարի վարչապետ, արտաքին գործերու նախարար Մոհամմատ պըն Ապտըլ Ռահմանը, որուն հետ քննարկեց ամերիկացիներուն մասնակցութեամբ ընթացող բանակցութիւններուն մանրամասնութիւնները՝ Տոհայի եւ Գահիրէի մէջ կատարուած բանակցային նիստերու լոյսին տակ:
