Իսկ իսրայէլեան զինուած ուժերու սպայակոյտի պետ զօրավար Հրցի Հլիվի իր ամերիկացի պաշտօնակիցին ընկերակցութեամբ շրջագայեցաւ Լիբանանի հետ սահմանամերձ շրջաններուն մէջ եւ յայտնեց, որ երկկողմանի համագործակցութիւնը կը խորանայ՝ դիմագրաւելու համար աճող մարտահրաւէրները: «Իսրայէլ ուժեղ է եւ կրնար պաշտպանել երկիրը, սակայն միշտ աւելի լաւ է ունենալ ուժեղ դաշնակից մը, որ կը կիսէ մեր արժէքները եւ ունինք համատեղ շահեր», ըսաւ իսրայէլացի զօրավարը: «Ամիս մը առաջ ահաբեկեցինք Հըզպալլայի զինուորական բարձրաստիճան հրամանատար Ֆուատ Շուքրը, որ պատասխանատու էր Մաժտալ Շամսի մէջ երեխաներու սպանութեան, իսկ երէկ կանխեցինք Հըզպալլայի լայնածաւալ գործողութեան մը ծրագիրը: Երէկ մեր կանխարգելիչ հարուածով կործանուած հրթիռներուն մեծամասնութիւնը ուղղուած էր իսրայէլեան դիրքերուն եւ հիւսիսային շրջանին», ըսաւ Հլիվի: Անոր համաձայն, բանակին գլխաւոր պարտականութիւնն է տեղահանուած քաղաքացիները վերադարձնել տուն: Այսուհանդերձ, Հլիվիի եւ իր ամերիկացի հիւրին այցելութենէն անմիջադէս ետք տեղի ունեցաւ Հըզպալլայի հրթիռային հերթական յարձակումը:
Միացեալ Նահանգներու Պաշտպանութեան նախարարութեան բանբերը յայտնեց, որ Ուաշինկթըն չէ մասնակցած Կիրակի օր Հըզպալլայի դիրքերուն դէմ Իսրայէլի գործած կանխարգելիչ հարուածներուն, սակայն տրամադրած է հետախուզական տեղեկութիւններ եւ հետեւած է Հըզպալլայի գործողութիւններու նախապատրաստութեանց:
