ԵՈՒՆՖԻԼ-ի խաղաղապահ ուժերու բանբերի տեղակալը յայտնեց, որ «Լիբանանի հարաւային շրջաններուն բնակիչները հանգստացան Իսրայէլի դէմ Հըզպալլայի հակադարձութենէն ետք եւ այսօր հանդարտութիւնը վերադարձաւ մարդոց առօրեային, իսկ հարաւի վիճակը նուազ լարուած էր, բաղդատած նախորդ փուլին հետ», ըսաւ ԵՈՒՆԻՖԻԼ-ի բանբերը: Անոր համաձայն, խաղաղապահ ուժերը մտահոգ էին, որ Հըզպալլայի հակադարձութիւնը դուռ բանար աւելի ընդարձակ հակամարտութեան, ուստի հաղորդակցած էր բոլոր կողմերուն հետ եւ պահանջած՝ հանդարտութեան վերականգնում:
Հըզպալլայի զինուորական բարձրաստիճան ղեկավարներէն Ֆուատ Շուքրի ահաբեկումին կուսակցութեան հակադարձութենէն օր մը ետք, Լիբանանի հարաւային շրջանին իրավիճակը վերադարձաւ անցնող աւելի քան 10 ամիսներու իր վիճակին՝ փոխադարձ հրթիռարձակումներու հաւասարակշռութիւն մը, որ կը կեդրոնանայ Հըզպալլայի դիրքերուն եւ իսրայէլեան սահմանամերձ զօրամասերուն վրայ: Այսուհանդերձ, իսրայէլեան ռազմական օդանաւերը երէկ վերստին հասան Պէյրութ, Մեթն եւ Քսըրուէն, ուր խզեցին ձայնի պատը: Իսկ իսրայէլեան անօդաչու սարքերուն հերթական թիրախը Լիբանանի մէջ Համասի պատասխանատուներէն մէկն էր, որուն ինքնաշարժը երէկ Սայտայի մէջ ենթարկուեցաւ հրթիռային հարուածի, սակայն թիրախաւորուած անձը յաջողեցաւ դուրս գալ ինքնաշարժէն եւ ծանր վէրքերով փրկուիլ մահափորձէն:
