Նշենք, որ Հըզպալլայի գործողութենէն առաջ եւ վերջ, իսրայէլեան օդուժը բազմաթիւ յարձակումներ գործեց լիբանանեան զանազան շրջաններու վրայ, պնդելով որ կը հարուածէ Հըզպալլայի զինամթերանոցներ եւ յարձակումի նախապատրաստութիւններ: Ռազմական օդանաւերուն եւ սարքերուն սաւառնումը ամբողջ օրը շարունակուեցաւ Լիբանանի ամբողջ տարածքին, հասնելով նոյնիսկ Աքքար, ուր ջախջախուեցաւ սարքերէն մէկը: Իսրայէլեան բանակի բանբեր Աւիխայ Ատրահի յայտնեց, որ շուրջ հարիւր ռազմական օդանաւ յարձակումներ գործած է Լիբանանի տարածքին, թիրախաւորելով Հըզպալլայի հրթիռային բազմաթիւ կայանքներ, որոնք տեղակայուած էին հարաւի ամբողջ տարածքին եւ ուղղուած թէ՛ իսրայէլեան հիւսիսային շրջաններուն, թէ՛ կեդրոնին: Ըստ Ատրահիի, հարուածները կեդրոնացած են Հըզպալլայի գործունէութեան աւելի քան 40 շրջանի մէջ: Իսկ պաշտպանութեան նախարար Եոաւ Կալանթ իր ամերիկացի պաշտօնակից Լոյտ Ուսթինին տեղեկացուց, թէ իսրայէլեան օդուժը Լիբանանի մէջ Հըզպալլայի դիրքերուն հասցուցած է դիպուկ հարուածներ՝ խափանելու համար իսրայէլացի քաղաքացիներուն դէմ մօտալուտ յարձակումի մը սպառնալիքը:
Լիբանանի Առողջապահութեան նախարարութեան համաձայն, իսրայէլեան հարուածներէն հարաւային Ալ-Թիրէի մէջ մահացած է երկու հոգի, իսկ Խիամի մէջ՝ մէկ:
