«Յաջողութեամբ աւարտած է Ֆուատ Շուքրի ահաբեկումին եւ Պէյրութի հարաւային արուարձաններուն մէջ քաղաքացիներու սպանութեան հակադարձութիւնը»: Այսպէս յայտարարեց Հըզպալլա երէկ իր կատարած օդային լայնածաւալ յարձակումին մասին, որ տեղի ունեցաւ առաւօտեան ժամերուն եւ թիրախաւորեց իսրայէլեան 11 զինուորական կէտեր եւ Պաղեստինի գրաւեալ հողերուն խորը գտնուող կարեւոր երկու թիրախ: Ըստ Հըզպալլայի, «Քառասունքի գործողութիւն» խորագրին տակ բազմաթիւ անօդաչու սարքեր միաժամանակ արձակուած են զանազան շրջաններէ եւ ուղղուած՝ իրենց թիրախներուն վրայ, մինչ հրթիռային եւ հրետանային ուժերը կը ռմբակոծէին սահմանային գօտիի մերձակայ զօրամասերը: Հըզպալլա աւելի ուշ հրապարակեց նաեւ տեսագրութիւն մը, որուն մէջ բացայայտեց երէկ յարձակումի ենթարկուած կէտերը ու հաստատեց, որ իրենց մշակած ծրագիրը գործադրուած է եւ բոլոր սարքերը ապահով հատած են օդային տարածքը եւ սաւառնած նախատեսուած թիրախներուն ուղղութեամբ: Հըզպալլայի հարուածներէն կարճ ժամանակով ելեկտրականութիւնը անջատուեցաւ Աքքա քաղաքին մէջ, մինչ առնչակից մարմիններ աշխատեցան վերականգնելու հոսանքը:
