Ձեր աշխատանքը աւելի արդիւնաւէտ կ’ըլլայ եթէ լաւ հաստատուած եւ շրջապատուած էք ձեր աշխատավայրին մէջ: Գործի բերմամբ օրական երկար ժամեր համակարգիչին դիմաց նստողներուն ուշադրութեան կ’արժէ յանձնել հետեւեալ կէտերը.
* Համակարգիչին պաստառը թեթեւօրէն դէպի վեր շեղել՝ տեսողութեան հանգստութեան համար:
* Աչքերը հորիզոնական գիծով մը պէտք է հաւասարին պաստառի վերի բաժնին:
* Ծոծրակն ու ողնաշարը պէտք է ըլլան ուղղահայեաց դիրքով:
* Աթոռը պէտք է ըլլայ հանգստաւէտ, օժտուած՝ կռնակին վարի մասը բռնող յենարանով մը, ինչպէս նաեւ՝ բարձրութիւնը ճշդող սարքով մը:
* Արմուկները պէտք է ծալուին ուղիղ անկիւն կազմելով, զոյգ դաստակները յենած՝ յատուկ կազմածի մը վրայ:
* Ծունկերը եւս ուղիղ անկիւն կազմելով՝ ծալել, իսկ զոյգ ոտքերը՝ հաստատ դնել գետին:
Պակսեցնել գործի հետ կապուած լարուածութիւնը.
* Աչքերը հանգստացնելու համար զանոնք շեղել ձեր գործէն եւ առանց գլուխն ու վիզը շարժելու՝ նայիլ ձեր շուրջ գտնուող տարբեր հեռաւորութեամբ եւ բարձրութեամբ իրերու:
* Ժամը անգամ մը 5-10 վայրկեան դադար առնել, բաց պատուհանի դիմաց խորունկ շնչել եւ արտաշնչել, անխօս՝ հեռուն դիտել եւ ջանալ միտքը պարպել:
Յոգնած աչքերու մարզանք.
* Զոյգ ցուցամատերով շրջանաձեւ մարձել աչքերուն վարի մասերը՝ պարբերաբար ուղղութիւնը փոխելով (ձախէն աջ եւ աջէն ձախ):
* Բութամատով եւ ցուցամատով բազմաթիւ անգամներ սեղմել քիթին վերի բաժինը՝ երկու աչքերուն միջեւ:
* Շրջանաձեւ մարձել այտերը:
* Շրջանաձեւ մարձել ճակատը:
* Ցուցամատերով մէկ վայրկեանի չափ ճնշել քունքերուն վրայ (աչքին եւ ականջին միջեւ եղող մասը):
