Միացեալ Նահանգներու նախկին նախագահ եւ նախագահական թեկնածու Տոնըլտ Թրամփ բուռն յարձակում գործեց գործող փոխնախագահ եւ ընտրութիւններուն իր մրցակից Քամալա Հարիսի նկատմամբ՝ արձակելով շարք մը ամբաստանութիւններ: Ըստ Թրամփի, Հարիս որպէս փոխնախագահ պատասխանատու է 7 Հոկտեմբերի Համասի յարձակումին, որովհետեւ կ’ատէ Իսրայէլը եւ նոյնիսկ ներկայ չգտնուեցաւ գոնկրէսին մէջ Պենիամին Նեթանիահուի ուղերձին: Խօսելով իր իշխանութեան տարիներուն, Թրամփ ըսաւ. «Ես Իրանը սնանկացուցի, ուստի դրամ չունէին փոխանցելու Հըզպալլային»: Ան նաեւ խօսեցաւ գաղթականներու Միացեալ Նահանգներ ապօրինի մուտքին մասին, ու շեշտեց, որ Հարիս կը խօսի ներգաղթը դիւրացնելու մասին, «որովհետեւ ծայրայեղ մարքսիստական մտածողութիւն ունի»: Նախկին նախագահը ահազանգեց, որ Հարիսի իշխանութեան տակ ապագայ չկայ, որովհետեւ ան աշխարհը պիտի առաջնորդէ համաշխարհային նոր պատերազմի մը:
