Ամերիկեան Սպիտակ տունը յայտարարեց, թէ որոշ յառաջընթաց արձանագրուած է Կազայի զինադադարին հարցով Գահիրէի բանակցութիւններուն ընթացքին: Անոր համաձայն, բանակցային հանդիպումներուն ընթացքը կառուցողական կը համարուի: Սպիտակ տան ազգային անվտանգութեան հարցերով բանբեր Ճոն Քիրպի յայտնեց, որ զինադադարի համաձայնութեան պարագային պիտի սկսի մարդասիրական օգնութիւններու հոսքը, Կազայի մէջ գերեվարուած իսրայէլացիները պիտի վերադառնան իրենց ընտանիքներուն: «Բոլոր կողմերը մանակցեցան բանակցութիւններուն, իսկ CIA-ի տնօրէնը պիտի ժամանէ Գահիրէ եւ միանայ նիստերուն», ըսաւ Քիրպի: Աւելի ուշ, իսրայէլացի պատասխանատու մը դրական համարեց Գահիրէի բանակցութիւնները, աւելցնելով որ սահմանային Ֆիլատելֆիա ճակատին վերաբերեալ տարակարծութիւնները կրճատուած են Եգիպտոսի եւ Իսրայէլի միջեւ:
Միացեալ Թագաւորութեան արտաքին գործերու նախարար Տէյվիտ Լամի հեռաձայնային հաղորդակցութիւն ունեցաւ Իրանի արտաքին գործերու նախարար Ապպաս Արաքժիի հետ ու շեշտեց Միջին Արեւելքի մէջ որեւէ մագլցումէ խուսափելու անհրաժեշտութիւնը: Նախարարին համաձայն, Կազայի մէջ զինադադարի հաստատումը, գերիներուն ազատ արձակումը եւ մարդասիրական օգնութիւններու փոխանցումը կը համարուին տարածաշրջանային հանդարտութեան նպաստող եւ մագլցումէ խուսափելու անհրաժեշտ քայլեր:
Իսկ Միացեալ Նահանգներու պաշտպանութեան նախարար Լոյտ Ուսթին յայտնեց, որ իր իսրայէլացի պաշտօնակից Եոաւ Կալանթի հետ քննարկած է Լիբանանի ճակատին վրայ հրաձգութեան փոխանակումը Իսրայէլի եւ Հըզպալլայի միջեւ: «Կալանթի հետ արծարծեցի Իրանի, Հըզպալլայի եւ Թեհրանի աջակցութիւնը վայելող կազմակերպութիւններուն կողմէ կացութիւնը սրելու փորձերը՝ Իսմայիլ Հանիէի եւ Ֆուատ Շուքրի ահաբեկումներէն ետք», ըսաւ Ուսթին:
