Իսրայէլեան բանակը յայտարարեց, թէ Կազայի պատերազմի սկիզբէն ի վեր կորսնցուցած է 695 սպայ եւ զինուոր, մինչ 645 ուրիշներ կրած են ծանր վէրքեր: Ըստ յայտարարութեան, 7 Հոկտեմբերէն ի վեր վիրաւորուած զինուորներուն ընդհանուր թիւն է 4357, որոնցմէ 2232-ը վիրաւորուած են Կազայի ցամաքային գործողութեան ընթացքին եւ 185-ը տակաւին հիւանդանոցներուն մէջ են: Իսկ վերջին 24 ժամերուն, 8 իսրայէլացի զինուոր վիրաւորուած են Կազայի ճակատներուն վրայ:
Իսրայէլեան լրատուամիջոցներ մինչ այդ հաղորդեցին, որ Հըզպալլային հետ բախումներուն ընթացքին մահացած է 44 հոգի՝ ներառեալ 24 քաղաքացի, 19 զինուոր եւ օտարազգի աշխատաւոր մը, իսկ վիրաւորներուն թիւը հասած է 271-ի՝ ներառեալ 141 զինուոր: Ըստ հրապարակումներուն, անցեալ ամիս Հըզպալլա արձակած է 1091 հրթիռ, եռապատկելով տարեսկիզբին կատարուած հրթիռարձակումներուն թիւը:
