Առողջապահութեան նախարարութեան արտակարգ գործողութիւններու կեդրոնը երէկ գիշեր յայտարարեց, թէ անցնող 24 ժամերուն ընթացքին հարաւի մէջ ինկած է առնուազն 8 զոհ եւ երեք վիրաւոր: Զոհեր պատճառած հարուածները եղած են Այթա Ժապալ, Թէյր Հարֆա, Մէյս էլ Ժապալ, Այթարուն եւ Մաարաքէ գիւղերուն մէջ: Իսրայէլեան ուժերը ծանրօրէն ռմբակոծեցին նաեւ Նաքուրայի ծայրամասերը, իսկ ռազմական օդանաւերը ձայնի պատը խզեցին հարաւային բոլոր շրջաններուն վերեւ: Կեդրոնը նաեւ յայտարարեց, որ Այթա Ժապալի վրայ իսրայէլեան յարձակում մը պատճառած է առնուազն երկու մահ՝ ներառեալ 7 տարեկան երեխայ մը: Իսկ Մայս էլ Ժապալի թիրախաւորումէն մահացած է առնուազն երկու հոգի, վիրաւորուած՝ երեք ուրիշներ: Հըզպալլա յայտարարութիւններով նշեց, թէ երէկ մահացած աձերուն մէկ մասը կուսակցութեան անդամներ են, աւելցնելով որ յարմար զէնքերով թիրախաւորած է Քֆարշուպայի բարձունքներուն վրայ գտնուող իսրայէլեան Սըմմաքա դիրքը, պատճառելով վնասներ: Հըզպալլայի երեսփոխաններէն Հասան Ֆատլալլա յայտնեց, որ, ի տես մերթ ընդ մերթ սրող իսրայէլեան ոտնձգութիւններուն եւ հարաւի ու Պեքաայի մէջ նոր շրջաններու ռմբակոծումին, Հըզպալլա մշակած է թիրախներու ցանկ մը, որուն միջոցաւ պիտի դիմակայէ այս փուլի դժուարութիւնները: «Որպէս օժանդակող ճակատ, մենք պիտի երաշխաւորենք Իսրայէլի պարտութիւնը այս պատերազմին», ըսաւ Ֆատլլալա:
