Հայաստանի մէջ կը պատրաստուին իզոթոփային գիտաշխատանոց կառուցել՝ ազգային արտադրանքին որակը ստուգելու նպատակով: Կառավարութեան նիստին յաջորդած ճեպազրոյցին ընթացքին լրագրողներուն այդ մասին յայտնած է տնտեսութեան նախարար Գէորգ Պապոյեանը:
Ան ձեռնպահ մնացած է Հայաստանի մէջ արտադրուած քոնեակի ոչ-անվտանգ ըլլալու մասին Ռուսաստանի մէջ հնչած վերջին յայտարարութիւնը մեկնաբանելէ՝ նշելով, որ իր ղեկավարած գերատեսչութիւնը անոր վերաբերեալ պաշտօնական որեւէ փաստաթուղթ չէ ստացած: Փոխարէնը, նախարարը յայտնած է, որ Եւրոմիութեան ծրագրերէն մէկուն շրջանակին մէջ ներկայիս կ’իրականացուի «Armenian brandy» ապրանքանիշի կայացման միտուած աշխատանք:
Իսկ առհասարակ հայկական արտադրանքին որակը ստուգելու նպատակով Հայաստանի մէջ կը նախատեսուի հիմնել իզոթոփային գիտաշխատանոց, որուն ստեղծման ուղղութեամբ, ըստ նախարարին, կը նախատեսուի գործնական քայլեր ձեռնարկել 2025 թուականէն սկսեալ: Աշխատանոցի գործարկման ժամկէտ Գէորգ Պապոյեանը չնշեց, սակայն ընդգծեց, որ նախագիծի չիրականացման պարագային հայաստանցի արտադրողներուն պիտի տեղեկացնեն սեփական արտադրանքին որակը եւրոպական որեւէ գիտաշխատանոցի մէջ ստուգելու պարտադիր պահանջին մասին: Այդպիսով, գիտաշխատային եզրակացութիւնը հնարաւորութիւն պիտի տայ փաստացի եւ հիմնաւորուած պատասխանելու տուեալ արտադրանքի որակին վերաբերեալ հարցումներուն եւ հնարաւոր դժգոհութիւններուն:
«Մեր տնտեսական քաղաքականութեան նպատակն է ապահովել Հայաստանի մէջ արտադրուող ապրանքներու եւ ծառայութիւններու որակին շարունակական աճը, որպէսզի կարենանք զանոնք վաճառել բոլոր երկիրներուն մէջ եւ գոնէ որակի հետ կապուած հարցեր չհնչեն, իսկ հնչելու պարագային՝ ներկայացնենք միջազգային գիտաշխատանոցներու փորձաքննութիւններուն արդիւնքները»,- նշեց Գէորգ Պապոյեանը:
Ան յայտնեց, որ Տնտեսութեան նախարարութիւնը Հայաստանի քոնեակագործներէն որեւէ ահազանգ չէ ստացած արտադրանքը Ռուսաստան արտահանելու հետ կապուած խոչընդոտներու վերաբերեալ:
Նախարարը տեղեկացուց նաեւ, որ 2024 թուականի պետական պիւտճէով չափանիշերու եւ չափագիտութեան ազգային մարմնին գումար յատկացուած է աւելի քան 1 միլիառ դրամի գիտաշխատանոցային նորագոյն սարքաւորումներ ձեռք բերելու նպատակով: Ըստ անոր, համանման ծրագրեր պիտի իրականացուին նաեւ յաջորդ տարիներուն: Միաժամանակ, ինչպէս նշեց Գէորգ Պապոյեանը, մասնաւոր հատուածը կը զարգացնէ իր գիտաշխատանոցային կարողութիւնները:
Ի դէպ, նախարարը առանց ճշգրիտ ապրանքանիշեր յստակացնելու նշեց, որ Ռուսաստան արտահանուած հայկական քոնեակները ներկայիս իզոթոփային ստուգման կ’ենթարկուին նոյն ինքն այդ երկրին մէջ:
