Միացեալ Նահանգները կ’ուսումնասիրէ Հայաստանի դիմումը՝ միանալու «123-րդ համաձայնագրին», որուն հաստատման պարագային Հայաստանը կրնայ ստանալ ամերիկեան քաղաքացիական միջուկային արհեստագիտութիւններ․ այս մասին «Սիվիլնեթ»ին տուած գրաւոր մեկնաբանութեան մէջ ըսած է Արտաքին գործերու նախարարութեան խօսնակը։
ԱՄՆ դաշնային օրէնքին համաձայն՝ ԱՄՆ կառավարութիւնը պէտք է ստորագրէ Միացեալ Նահանգներու հիւլէական ուժանիւթի գործակալութեան արձանագրութեան 123-րդ բաժինը, որ կը սահմանէ այլ երկիրներու քաղաքացիական միջուկային արհեստագիտութիւններ փոխանցելու անհրաժեշտ պայմանները։ ԱՄՆ-ն նման գործարքներ ունի 48 երկիրներու եւ տարածքներու հետ՝ ըստ Արտաքին գործերու նախարարութեան 2022-ին թարմացուած տուեալներուն:
Եթէ Հայաստանը միանայ «123-րդ համաձայնագրին», այդ կրնայ ճանապարհ հարթել Հայաստանի մէջ ամերիկեան արհեստագիտութիւններով նոր աթոմակայան նախագծելու եւ կառուցելու համար, որ պիտի փոխարինէ Մեծամորի՝ դեռ խորհրդային ժամանակաշրջանին կառուցուած աթոմակայանին:
«Թէեւ մենք չենք կրնար տրամադրել այլ երկիրներու հետ ԱՄՆ կառավարութեան բանակցութիւններու ներքին գործընթացին մանրամասնութիւնները՝ Միացեալ Նահանգները կ’ողջունէ Հայաստանի հետ քաղաքացիական միջուկային համագործակցութիւնը խորացնելու հնարաւորութիւնները»,- նշուած է պատասխանին մէջ։
«ԱՄՆ կառավարութիւնը չի կիսեր բանակցային գործընթացին մանրամասնութիւնները, բայց մենք կրնանք ըսել, որ Արտաքին գործերու նախարարութիւնը պատշաճ ուշադրութիւն կը դարձնէ «123-րդ համաձայնագրին» միանալու Հայաստանի խնդրանքին»,- ըսած է Արտաքին գործերու նախարարութեան խօսնակը։
