Ուքրանիոյ նախագահ Վոլոտիմիր Զելենսքի յայտնեց, որ ուքրանական ուժերը Ռուսիոյ սահմանային Քուրսք նահանգին մէջ գրաւած են բնակավայր մը եւս: Նշենք, որ Քուրսքի գործողութիւնը սկսած էր 6 Օգոստոսին, սակայն ռուսական կողմը կը շեշտէ, որ այդ նահանգին մէջ յառաջանալու ուքրանական բոլոր փորձերը ձախողած են եւ յարձակողները նահանջած՝ կրելով ծանր կորուստներ:
Իսկ Ռուսիոյ նախագահ Վլատիմիր Փութին ահազանգեց, թէ ուքրանական ուժերը փորձած են թիրախաւորել Քուրսք նահանգի հիւլէակայանը, աւելցնելով որ Մոսկուա այդ մասին պաշտօնապէս տեղեկացուցած է Հիւլէական ուժանիւթի միջազգային գործակալութեան:
Ռուսիոյ «Ինթըրֆաքս» լրատու գործակալութիւնը հաղորդեց, որ սեւ ծուխ բարձարցած է Վոլկոկրատ շրջանի Մարինովքա խարիսխէն, անօդաչու սարքերով կատարուած ուքրանական յարձակումէն ետք: Ռուսական լրատուամիջոցներ նախապէս հաղորդած էին, որ հակաօդային պաշտպանութեան ուժերը զսպած են անօդաչու սարքերով գործողութիւնը եւ կործանած են ուքրանական սարքերուն մեծամասնութիւնը:
