Առողջապահութեան նախարարի պաշտօնակատար Ֆիրաս Ապիատ գրասենեակին մէջ հիւրընկալեց ՄԱԿ-ի գաղթականներու հարցերով զբաղող յանձնակատարի գրասենեակին պատուիրակութիւնը՝քննարկելու Լիբանան ապաստանած սուրիացիներուն տրամադրուած բժշկական ծառայութիւնները, կեդրոնանալով իսրայէլեան ոտնձգութիւններէն վիրաւորուած սուրիացիներուն վրայ: Հիւր պատուիրակութիւնը հաստատեց, որ յանձնակատարի գրասենեակը ՄԱԿ-ին հետ գործակցող հիւանդանոցներուն մէջ կը հոգայ միայն վիրաւոր այն սուրիացի տեղահանուածներուն, որոնք որպէս պաշտօնապէս արձանագրուած են ՄԱԿ-ի մօտ՝տրամադրելով մինչեւ հինգ հազար ամերիկեան տոլարի գումար, աւելցնելով որ աշխատանք պիտի տարուի ընդարձակելու հիւանդանոցներուն ցանցը, պատերազմի ընդարձակումին պարագային:
Ժողովականները անհրաժեշտ համարեցին բարերար կողմերու հետ հաղորդակցութիւնը, որպէսզի կարելի ըլլայ լուծել նաեւ ՄԱԿ-ի մօտ չարձանագրուած տեղահանուածներուն խնդիրը:
