Լիբանանի Կեդրոնական դրամատան կառավարիչի պաշտօնակատար Ուասիմ Մանսուրի յայտնեց, որ Արաբական դրամատուներու համադաշնակցութեան հովանաւորած դրամի լուացումի եւ ահաբեկչութեան ֆինանսաւորումին դէմ պայքարի տարեկան համագումարին Լիբանանի մէջ կազմակերպումը ցոյց կու տայ, որ համադաշնակցութիւնը յանձնառու կը մնայ աջակցելու Լիբանանի դրամատնային ոլորտին եւ արաբական դրամատուներուն միջեւ համագործակցութեան ամրապնդումին՝ դիմակայելու ճակատագրական խնդիրները, որոնք կը վտանգեն արաբական աշխարհի տնտետական ապահովութիւնը: Մանսուրի իր բացման խօսքին մէջ յստակացուց, որ դրամի լուացումին եւ ահաբեկչութեան ֆինանսաւորումին դէմ պայքարը առաջնահերթութիւն է Լիբանանի համար եւ կարելի եղած է հասնիլ մեծ յաջողութիւններու՝ յաղթահարելէ ետք բազում դժուարութիւններ: Մանսուրի դիտել տուաւ, որ 2002-ին Լիբանանի անունը հեռացուցած են այս ծիրին մէջ չհամագործակցող պետութիւններու ցուցակէն, որմէ ետք Պէյրութ սկսած է ստանալ միայն գնահատականներ: Ան իր խօսքին մէջ նաեւ շեշտեց, որ Կեդրոնական դրամատունը մեծ աշխատանք կը տանի, որպէսզի Լիբանան միջազգային ելեւմտական կազմակերպութիւններու կողմէ չդասուի ֆինանսական մոխրագոյն գօտիին մէջ:
