Միացեալ Նահանգներու բանակը յայտարարեց, թէ «USS Abraham Lincoln» օդանաւակիր նաւը եւ անոր ընկերակցող մարտանաւերու խումբը հասած են Միջին Արեւելք՝ առ ի գործադրութիւն պաշտպանութեան նախարար Լոյտ Ուսթինի հրահանգին: Այսպիսով, Միջերկրականի արեւելեան շրջանին մէջ այժմ խարիսխ նետած է ամերիկեան երկու օդանաւակիր, քանի մը տասնեակ ընկերակցող մարտանաւերու կողքին՝ Համասի նախկին ղեկավար Իսմայէլ Հանիէի ահաբեկումէն ետք սրած լարուածութեան լոյսին տակ:
Միւս կողմէ, Եմէնի մէջ իշխող հուսիներու ղեկավարը յայտնեց, որ Իսրայէլին տրուելիք հակադարձութեան հարուածը պիտի ըլլայ ցաւոտ: Ըստ Ապտ էլ Մալիք Պատր էլ Տին Ալ Հուսիի, հակադարձութեան ուշացումի պատճառներէն է ուժգին հարուածի մը մշակումը:
