Միացեալ Նահանգներու Արտաքին գործերու նախարարութիւնը յայտարարեց, թէ նախարար Անթոնի Պլինքըն Քաթարի Թամիմ պըն Համատ իշխանին հետ քննարկած է Կազայի մէջ զինադադար յայտարարելու բանակցութիւնները: Ըստ յայտարարութեան, Պլինքըն եւ Քաթարի իշխանը շեշտած են, որ տարածաշրջանային որեւէ ուժ պէտք չէ խափանէ զինադադարի համաձայնութեան յանգելու փորձերը:
Ամերիկեան Սպիտակ տունը յայտարարեց, թէ նախագահ Ճօ Պայտըն Իսրայէլի վարչապետ Պենիամին Նեթանիահուի հետ հեռաձայնային հաղորդակցութեամբ մը քննարկած է Կազայի մէջ զինադադար յայտարարելու ջանքերը: Զրոյցին միացած է փոխնախագահ, նախագահական թեկնածու Քամալա Հարիսը: Զրուցակիցները քննարկած են նաեւ Կազայի մէջ գերեվարուածները ազատ արձակելու ուղղութեամբ ջանքերը:
