Սփիւռքահայ 53 պատանի համախմբուած է Համահայկական հայագիտական մրցոյթի շրջանակին մէջ:
Այս տարի մրցոյթին մասնակցած է 14-18 տարեկան 53 պատանի՝ Վրաստանէն, Ռուսաստանի Դաշնութենէն, Սպանիայէն եւ Քուէյթէն:
Մրցոյթին նպատակն է խրախուսել հայոց լեզուի, գրականութեան եւ պատմութեան իմացութիւնը արտերկրի մէջ բնակող հայ երեխաներու շրջանակին մէջ, օգնել անոնց ճանչնալ Հայաստանը եւ ծանօթանալ տարբեր երկիրներու մէջ բնակող հասակակիցներու հետ:
Մրցոյթը տեղի ունեցած է երեք թեմատիկ ուղղութեամբ՝ հայոց լեզու, գրականութիւն եւ հայոց պատմութիւն: Հարցաշարքերը կազմած են մասնագիտական յանձնաժողովները, որոնց կազմը համալրուած է տարբեր համալսարաններէ: Կրթութեան, գիտութեան, մշակոյթի եւ մարմնամարզի նախարարութեան Արտաքին կապերու եւ սփիւռքի վարչութեան սփիւռքի հետ կապերու բաժնի պետ Կարէն Մնացականեանի խօսքով՝ մրցոյթը այս տարի տեղի ունեցած է այլ ձեւաչափով՝ որպէս ստուգատես, այլ ոչ թէ մրցոյթ, հետեւաբար յաղթողներ չեն առանձնացուած: «Թէեւ մասնակիցները նախապէս չեն ունեցած հարցումները, բայց, ի զարմանս մեզ, արդիւնքները սպասուածէն լաւ էին»,- կ’ըսէ Կարէն Մնացականեանը:
Մրցոյթի ծիրին մէջ անցկացուելտեղի ունեցած են երգի, ասմունքի միջոցառումներ, խոհարարական վարպետութեան դասեր, ինչպէս նաեւ ուսումնաճանաչողական այցեր Գառնիի հեթանոսական տաճար, Գեղարդ վանական համալիր եւ Սեւանավանք: Յուշարձաններ այցերու ընթացքին սփիւռքահայ պատանիներուն մանրամասն ներկայացուած են անոնց պատմութիւնն ու մշակութային արժէքը:
Պատանիներուն խօսքով՝ մրցոյթին մասնակցութիւնը իրենց տուած է թէ՛ բազմաթիւ ընկերներ, թէ՛ հարուստ գիտելիք: Անոնք կը վստահեցնեն՝ նոյնիսկ իրենց օտարազգի ընկերներուն հայերէն պիտի սորվեցնեն, որպէսզի անոնք եւս մասնակցին յաջորդ մրցոյթին:
Մրցոյթի աւարտին երեխաներուն տրուած են մասնացութեան վկայականներ, իսկ գաղութներուն՝ խորհրդանշական նուէրներ:
