Անցնող օրերուն ելեկտրամատակարարումի ամբողջական դադրեցումի լոյսին տակ, Լեռնալիբանանի Վճռաբեկ ատեանի ընդհանուր դատախազ Ժամալ Հաժժար բացաւ հետաքննութիւն՝ իմանալու տեղի ունեցած թերութեան պատասխանատուներն ու մանրամասնութիւնները, հիմնուելով այդ հարցով իրեն հասած վարչապետի պաշտօնակատար Նեժիպ Միքաթիի յուշագրին վրայ: Դատախազը Պէյրութի Արդարադատութեան պալատին մէջ երէկ արձանագրեց ուժանիւթի եւ ջուրի հարցերու նախարարի պաշտօնակատար Ուալիտ Ֆայյատի եւ Ելեկտրականութեան հաստատութեան ընդհանուր տնօրէն Քամալ Հայէքի վկայութիւնները: Ֆայյատ եւ Հայէք ապա մեկնեցան առանց մեկնաբանութեան:
Ուժանիւթի նախկին նախարար Նատա Պուսթանի ահազանգեց, թէ Զուքի եւ Ժիյյէի ելեկտրակայանները գործարկելու պայմանագիր կնքած են եւ «Ժատիտ» հեռատեսիլի կայանի սեփականատէրեր Խայյաթ ընտանիքին պատկանող EMP ընկերութեան մթերանոցներուն մէջ կայ քարիւղի մեծ պաշար, թէեւ քանի մը օր առաջ յայտարարուած էր, թէ ելեկտրամատակարարումը դադրած է քարիւղի անբաւարարութեան պատճառով: Պուսթանի նոյն ընկերութիւնը ամբաստանեց նաեւ Ելեկտրականութեան հասատատութենէն 38 միլիոն տոլարի գումար ստանալով հանդերձ ելեկտրակայաններուն անհրաժեշտ նորոգութիւնները չկատարելու մէջ, վարչապետի պաշտօնակատար Նեժիպ Միքաթիի եւ քննչական համապատասխան կառոյցներուն կոչ ուղղելով միջամտելու եւ բացայայտելու գայթակղութեան բոլոր ծալքերը եւ պատժելու յանցագործները, որոնք լիբանանցիները զրկած են ելեկտրականութենէ:
