Պատերազմի փոխադարձ սառնալիքներու լոյսին տակ, Հըզպալլա եւ Իսրայէլ վերջին օրերուն ընդարձակած են թիրախաւորումի շրջագիծը եւ կը հարուածեն շրջաններ, որոնք անցնող շրջանին գրեթէ զերծ մնացած էին զինուորական գործողութիւններէն: Երէկ վաղ առաւօտեան, իսրայէլեան անօդաչու սարքերը վերստին հասան Սայտա, ուր Վիլլաներու թաղամասին մէջ թիրախաւորեցին ինքնաշարժ մը՝ ահաբեկելով Ֆաթհ շարժումի «Երուսաղէմի փաղանգներ» զինեալ թեւի Լիբանանի շրջանի հրամանատար Մունիր Մաքտահի եղբայրը՝ Խալիլ Մաքտահը: Մունիր Մաքտահը աւելի ուշ յայտնեց, որ եղբայրը Ֆաթհ շարժումի գնդապետ էր եւ կ’աշխատէր զինեալ թեւի շարքերուն մէջ: «Ահաբեկումները կ’ամրացնեն մեր ուժն ու կամքը, իսկ նահատակութիւնը պատուոյ շքանշան է», ըսաւ Մաքտահ:
Առողջապահութեան նախարարութեան արտակարգ գործողութիւններու կեդրոնը յայտարարեց, թէ լիբանանցի մը եւ սուրիացի մը զոհուած են երէկ հարաւային Պէյթ Լիֆ եւ Ուազզանի շրջաններու թիրախաւորումին պատճառով:
Կեդրոնը այլ հաղորդագրութեամբ մը նշեց, թէ Երեքշաբթի գիշեր Պեքաայի մէջ թիրախներու ռմբակոծութեան պատճառով կայ զոհ մը եւ 30 վիրաւոր՝ ներառեալ 9 երեխայ եւ չորս սուրիացի: Ըստ յայտարարութեան, հիւանդանոց մուտ գործած հինգ վիրաւորներէն մէկուն վիճակը չափազանց ծանր է:
