Հըզպալլայի ռազմական լրատուութիւնը երէկ յայտարարեց, թէ բռնագրաւեալ Կոլանի մէջ «Քաթիւշա» տիպի հրթիռներով թիրախաւորած է իսրայէլեան կարեւոր Ցնոպար ռազմակայանը եւ անոր մերձակայ զինուորական կուտակումները: Այլ հաղորդագրութեամբ մը Հըզպալլա նշեց, թէ առաջին անգամ ըլլալով ռմբակոծած է իսրայէլեան Շամիր եւ Քացրին բնակավայրերը եւ Ռամիմ զօրամասը: Հըզպալլայի համաձայն, սոյն յարձակումները հակադարձութիւն էին Մարժաայունի եւ Պեքաայի ռմբակոծումին: Իսկ Հըզպալլայի երեսփոխաններէն Իպրահիմ Մուսաուի յայտնեց, որ զինուորական ղեկավար Ֆուատ Շուքրի ահաբեկումին Հըզպալլայի հակադարձութիւնը պիտի չըլլայ քօղարկուած, այլ շատ յստակ եւ այդ պիտի տեսնեն բոլորը: Իսրայէլեան շտապ օգնութիւնը յայտարարեց, թէ Քացրինի մէջ մարդ մը թեթեւօրէն վիրաւորուած է, իսկ նիւթական վնասներու ենթարկուած են բնակարաններ եւ ինքնաշարժներ:
Միւս իսրայէլեան ռազմական օդանաւերը երէկ քանի մը թռիչքներով խախտեցին լիբանանեան օդային տարածքը, սաւառնելով ինչպէս հարաւի, այնպէս ալ Լեռնալիբանանի եւ Պէյրութի վրայ, ուր երկու անգամ խզեցին ձայնի պատը: Վարչապետ Պենիամին Նեթանիահու պնդեց, որ իրենք պատրաստ են բոլոր ընտրանքներուն, ըլլան յարձակողական կամ պաշտպանողական: Իսրայէլեան բանակի բանբեր Տանիէլ Հակարի Հըզպալլան ամբաստանեց «իսրայէլացի քաղաքացիներուն վրայ անկանոն կրակ բանալու մէջ», խոստանալով այսուհետեւ ըստ այնմ վարուիլ: Իսրայէլի ազգային անվտանգութեան հարցերու նախարարը իր կարգին պահանջեց «անյապաղ յարձակիլ Լիբանանի վրայ եւ չկորսնցնել յարմար առիթը»: Իսկ ընդդիմութեան առաջնորդ Եաիր Լափիտ կարծիք յայտնեց, որ իսրայէլեան կառավարութիւնը կորսնցուցած է երկրին հիւսիսային շրջանը:
