Համաս շարժումը խստիւ դատապարտեց Միացեալ Նահանգներու նախագահ Ճօ Պայտընի վերջին յայտարարութիւնները, ուր Պայտըն Համասը պատասխանատու կը համարէր Կազայի մէջ զինադադար յայտարարելու բանակցութիւներու ձախողութեան: «Պայտընի եւ նախարար Պլինքընի յայտարարութիւնները իրականութիւնը շեղող անհիմն պնդումներ են, որոնք չեն արտացոլեր իսկական զինադադար պահանջող Համասի կեցուածքը», յայտարարեց շարժումը: Համասի համաձայն, ամերիկեան յայտարարութիւնները կը բացայայտեն Իսրայէլին ամբողջական զօրակցութիւն եւ զիջում՝ ահաբեկիչ Նեթանիահուի նոր նախապայմաններուն: «Այն ինչ մեզի առաջարկուեցաւ անցնող օրերուն կը համարուի յեղաշրջում՝ 31 Մայիսին ինքնին Պայտընի կատարած առաջարկներուն», յայտարարեց Համաս՝ աւելցնելով, որ միշտ դրական վերաբերմունք ունեցած է եգիպտական միջնորդութեան նկատմամբ: Իսրայէլի վարչապետ Պենիամին Նեթանիահու իր կարգին շեշտեց, որ Իսրայէլ երբեք պիտի չընդունի Կազայի պատերազմին վերջ տուող բանակցային առաջարկները:
Միացեալ Նահանգներու նախագահ Ճօ Պայտըն վերահաստատեց, որ տակաւին աշխատանք կը տարուի Կազայի մէջ զինադադար յայտարարելու ուղղութեամբ: Ան հաւաստիացուց, որէ բանակցային դիրքերը այսօր աւելի մօտ են, քան երբեք: Իսկ Արտաքին գործերու նախարարութեան արտաքին հարցերով բանբեր Սամուէլ Ուըրպըրկ վստահեցուց, որ Համաս որեւէ ապագայ պիտի չունենայ յետպատերազմեան Կազայի մէջ: Անոր խօսքով, այլ պաղեստինցիները պէտք է ընտրեն իրենց կառավարութիւնը: Խօսելով բանակցութիւններուն մասին, Ուրպըրկ բացատրեց, թէ Ուաշինկթըն ներկայացուցած է բանակցային տարակարծութիւնները յաղթահարող եւ հակամարտողներուն դիրքերը մօտեցնող առաջարկներ՝ միաժամանակ նկատի առնելով Եգիպտոսի մտահոգութիւնները:
