Կը սպասուի, որ Լիբանան առաքուած ալճերական 30 հազար թոն վառելանիւթը հասնի 24 Օգոստոսին, որմէ ետք պիտի կատարուին տարրալուծական քննութիւններ, ապա բեռը յանձնուի ելեկտրակայաններուն՝ ելեկտրամատակարարումի ժամանակահատուածը բարձրացնելով օրական շուրջ վեց ժամի: Այս մասին յայտնեց ուժանիւթի եւ ջուրի հարցերու նախարարի պաշտօնակատար Ուալիտ Ֆայյատ:
Լիբանանի մէջ ելեկտրականութեան շարունակական խնդիրներուն եւ քանի մը օր առաջ տիրած ամբողջական խաւարի լոյսին տակ սուր քննադատութիւններու եւ բազում անարգանքներու թիրախ դարձած Ֆայյատ ժխտեց իր գլխաւորած նախարարութեան պատասխանատուութիւնը այս հարցով եւ պնդեց, թէ յանցաւորը ամերիկեան պաշարումն է, որ Լիբանանը կը զրկէ վառելանիւթ ստանալու այլընտրանքային զանազան աղբիւրներէ: Ֆայյատ յիշեցուց, որ Յորդանանի ու Եգիպտոսի հետ կնքուած ուժանիւթային հակամաձայնութիւնը չէ գործադրուած Սուրիոյ նկատմամբ ամերիկեան «Կեսար» պատժամիջոցներուն հետեւանքով:
Ռուսական «Սփութնիք»-ին տրուած հարցազրոյցի մը մէջ Ֆայյատ բողոքեց, որ Լիբանանի դիմագրաւած ճնշումները սկիզբը ունէին վարչական թիրախներ, ապա վերածուեցան ելեւմտականի եւ ապահովականի, որոնք կը վերաբերին Իսրայէլի անվտանգութեան:
