Բարունակ. Բարեւ Սամուէլ, ինչպէ՞ս ես:
Սամուէլ. Լաւ եմ, դուն ինչպէ՞ս ես:
Բարունակ. Լաւ եմ, բայց շուարած եմ: Ինչպէ՞ս բացատրենք անցեալ տարի 7 Հոկտեմբերին Համասի «Աքսայի փոթորիկը» կոչուող ռազմական գործողութիւնը եւ իսրայէլացի քաղաքացիներու ու զինուորականներու առեւանգումը, որուն դէմ Իսրայէլ ռազմական լայնածաւալ գործողութիւն մը սկսաւ՝ ազատագրելու «գերիները»: Պատերազմը մինչեւ այսօր կը շարունակուի, ոչ Համաս կրցաւ Իսրայէլի բանտերուն մէջ գտնուող իր անդամները փոխանակել «պատանդներուն» դիմաց, ոչ ալ Իսրայէլ կրցաւ վերադարձնել Համասի մօտ գտնուող «գերիները»: Կազայի հատուածը ամբողջութեամբ կործանուած է, միլիոնաւոր մարդ ծայրայեղ թշուառութեան մէջ կ’ապրին, 40.000-է աւելի զոհ կայ, որոնց մեծ մասը կիներ ու երեխաներ են, Իսրայէլ ամէն օր նոր ոճիրներ կը գործէ: Իսկ միւս կողմէն Իրան իր ամբողջ կողմնակիցներով մխրճուած է պատերազմին մէջ:
Սամուէլ. Իմ բարի ընկեր, սիրելի Բարունակ, իմ կարծիքովս
1) «Աքսայի փոթորիկը» գործողութիւնը, որուն հեղինակը Եահիա Սընուարն էր, լարուած ծուղակ մըն էր Համասին: Պատահածը անտրամաբանական դէպք մըն էր, մանաւանդ երբ այսօր կը տեսնենք Իսրայէլի հետախուզական եւ արհեստագիտական կարողութիւնները:
2) Իսրայէլի քարոզչութիւնը յաջողեցաւ այդ գործողութիւնը որպէս պատրուակ ծառայեցնելու՝ Կազան «մաքրելու» եւ Համասի ղեկավարները սպանելու, բացի Եահիա Սընուարէն, որ «Աքսայի փոթորիկը» գործողութեան հեղինակն ու ղեկավարն էր: Հոս երկու մեծ հարցման նշաններ կը նշմարեմ:
ա) Իսրայէլ ինչպէ՞ս Թէհրանի մէջ գտաւ եւ սպաննեց խիստ պաշտպանուած Հանիէն, իսկ ժողովուրդին մէջ պտըտող Սընուարը չգտաւ…
բ) Հանիյէի սպանութեան յաջորդ օրը Իսրայէլի համար գլխաւոր թիրախ հանդիսացող՝ Կազայի փլատակներուն մէջ «թաքնուած» Սընուարը ընտրուեցաւ Համասի ղեկավար:
3) Իրանը տարածաշրջանային պետութիւն է, իր ազդեցութեան տակ առած է Լիբանանը, Սուրիան, Եմէնը եւ Իրաքը: Գաղտնիք չէ, որ Իրանի ծաւալումը կը հակասէ ԱՄՆ-ի եւ Իսրայէլի կենսական շահերուն:
Ուրեմն, Իմ բարի ընկեր Բարունակ, այս բոլոր դաւադրութիւնները նոյն մութ սատանայական ատեաններէն կ’ելեն, ուր որոշուեցան եւ գործադրուեցան բոլոր մարդկութեան դէմ ոճիրները, սկսեալ Հայոց ցեղասպանութենէն մինչեւ այսօրուան ցեղասպանութիւնները: Այդ մութ սենեակերուն մէջ նստած, մարդու կերպարանք ունեցող երկոտանիները Աստուծոյ պատուիրաններով կը խօսին, բայց անոնց տէրը ոսկին է, եղբայրութեան մասին կը ճառեն, բայց մարդկային դիակներով կը սնուին եւ ժողովուրդներ թշուարացնելով կը զուարճանան:
Մենք Պաղեստինի ժողովուրդին պետութիւն ունենալու արդար իրաւունքին հետ ենք: Պաղեստինի ժողովուրդին օրինական ներկայացուցիչը Պաղեստինի ազատագրութեան կազմակերպութիւնն է: Մենք կը դատապարտենք իսրաէլեան բանակին կատարած բոլոր չարդարացուած ոճիրները եւ զաւթիչ գործողութիւնները:
Նշմարեց՝
Սամուէլ Ղազարեան
