«Հ.Մ.Մ.-Պէյրութ»ի սկաուտական կազմի տարեկան մեծ բանակումի նախօրէին, առ ի նախապատրաստութիւն 31 Օգոստոսէն մինչեւ 8 Սեպտեմբեր «Ռաս էլ Մաթըն»ի չքնաղ բնութեան գիրկը կայանալիք 9-օրեայ բանակումին, «Հ.Մ.Մ.-Պէյրութ»ի Սկաուտական խորհուրդը եւ խմբապետական կազմը կազմակերպեցին երկօրեայ սեմինար մը Հ.Կ.Բ.Մ.-ի Սահակեան-Լ. Մկրտիչեան գոլէճէն ներս:
Օրակարգը կ’ընդգրկէր սկաուտական գիտելիքներու եւ ձեռային աշխատանքներու իրագործման համար անհրաժեշտ բոլոր մանրամասնութիւններուն ծրագրաւորման, բացատրողական դասընթացքներու ընդհանուր ժամանակացոյցի սահմանումը: Երեք դասընթացքներու ընթացքին երկրորդական կարգի արիներն ու արենոյշները ունկնդրեցին բանակումի՝ ընդհանուր, կարգապահութեան եւ ձեռային աշխատանքներու (սկաուտական պարանով կապելու զանազան ձեւեր) գիտելիքներ: Սոյն դասընթացքներէն բացի, անոնք մասնակցեցան ընդհանուր զարգացման մրցումներու, մարզական խաղերու եւ դրօշակի արարողութեանց:
