Հայաստանի եւ Ատրպէյճանի միջեւ կնքուած խաղաղութեան պայմանագիրը պէտք է վերացնէ ապագային երկիրներուն միջեւ տարածքային խնդիրին վերադառնալու բոլոր հնարաւոր վտանգները։ Այս մասին ըսած է Ատրպէյճանի արտաքին գործերու նախարար Ճէյհուն Պայրամովը։
«Մեզի համար գլխաւոր խնդիրն այն է, որ բոլոր տարածքային պահանջները, որոնք գոյութիւն ունին, պէտք է ամբողջութեամբ վերացուին, եւ փաստաթուղթը, իտէալականը խաղաղութեան պայմանագիրը, պէտք է վերացնէ բոլոր հաւանական վտանգները, ապագային այս հարցին հաւանական վերադարձը»,- ըսած է Պայրամով։
Անոր խօսքով՝ գործընթացը աւարտին հասցնելու հիմնական խոչընդոտը այն է, որ «Հայաստանի անկախութեան հռչակագիրը եւ երկրի Սահմանադրութիւնը տակաւին տարածքային պահանջներ կը պարունակեն Ատրպէյճանի նկատմամբ», ինչ որ անընդունելի է Ատրպէյճանի համար։
Պայրամով նաեւ յայտնած է, որ Ռուսատտանի նախագահ Վլատիմիր Փութինի դերը՝ 2020 թուականին Ատրպէյճանի եւ Հայաստանի միջեւ հակամարտութեան կարգաւորման շուրջ պայմանաւորուածութիւններու ձեռքբերման գործին մէջ, եղած է առանցքային․
«Արդիւնքը 2020թ․ Նոյեմբեր 9-10-ի եռակողմ համաձայնագիրն էր»,- ըսած է ան՝ յաւելելով, որ 2020-22 թուականներուն յետհակամարտային կարգաւորման շրջանակներուն մէջ ռուսական կողմին մասնակցութեամբ բազմաթիւ հանդիպումներ տեղի ունեցած են։
Պայրամով նաեւ նշած է, որ Ատրպէյճանը նպատակաուղղուած է Հայաստանի հետ յարաբերութիւններու կարգաւորման, սակայն հայկական կողմին՝ տասնամեակներով թելադրած «բոլոր անհիմն պահանջները» պէտք է ամբողջութեամբ վերացուին. «Ատիկա պէտք է տեղի ունենայ ոչ թէ յայտարարութիւններու մակարդակով, այլ արտացոլուի իրաւաբանօրէն հիմնաւորուած ձեւերով»։
Պայրամով նաեւ ընդգծած է, որ իրենց համար ռուսական հարթակը միշտ ընդունելի եղած է, եւ ան մեղադրած է Հայաստանը անոր համաձայնութիւն չտալու մէջ։
