Սեպտեմբերին պիտի սկսի «Ժողովրդվարական ուժերու հարթակ»-ին նախաձեռնած Հայաստանի՝ ԵՄ-ին անդամակցելու հարցով ստորագրահաւաքը. այսօր հրաւիրուած ասուլիսին այս մասին յայտնեց «Հանրապետութիւն» կուսակցութեան նախագահ Արամ Սարգսեանը։
«Անոր համար ձեւաւորուած է նախաձեռնող խումբ։ Օրէնքը կը պահանջէ, որ նախաձեռնող խումբին մէջ ըլլայ առնուազն 25 անդամ։ Մեր մօտ, եթէ չեմ սխալիր, անդամներուն թիւը 50-ի կը հասնի։ Նախաձեռնող խումբը իր մէջէն կ’ընտրէ լիազօր ներկայացուցիչ, որ խումբին անունով հանդէս պիտի գայ Կեդրոնական ընտրական յանձնաժողովին մէջ։ Ստորագրահաւաքէն յետոյ նաեւ հանդէս պիտի գայ Ազգային ժողովի Պետաիրաւական յանձնաժողովին մէջ՝ ներկայացնելով զայն։ Եթէ Պետաիրաւական յանձնաժողովը հաստատէ, յետոյ նաեւ ԱԺ լիագումար նիստին պէտք է ներկայացնէ նախաձեռնութիւնը»,- մանրամասնեց Սարգսեանը։ «Հանրապետութիւն» կուսակցութեան նախագահը յայտնեց, որ նախաձեռնող խումբը լիազօր ներկայացուցիչ նշանակած է Արտակ Զեյնալեանը։
«Մեզի խօսակցութիւններ կը հասնէին, որ իշխանութեան բացարձակ ձեռնտու չէ, որ 50 հազար ստորագրութիւն հաւաքենք եւ իրենք ալ մերժեն։ Մենք նախաձեռնութիւնը ծայր աստիճան անխոցելի ըրած ենք, որ ԿԸՅ-ն չմերժէ»,- նշեց ան։
Եթէ Հայաստանի 50 հազար քաղաքացիի ստորագրութիւն հաւաքուի, ապա, համաձայն Սահմանադրութեան, հարցը պիտի մտնէ Ազգային ժողովի օրակարգ։ Չընդունուելու պարագային անհրաժեշտ պիտի ըլլայ 300 հազար ստորագրութիւն՝ նախագիծը հանրաքուէի դնելու համար։
Յիշեցնենք, որ 21 Յունիսին ժողովրդավարական ուժերուն նախաձեռնութեամբ ԵՄ-ին Հայաստանի անդամակցելու հարցով հանրաքուէ կայացնելու հարցով նաեւ տեղի ունեցած են խորհրդարանական լսումներ։ Վարչապետ Նիկոլ Փաշինեան «Ժողովրդավարութեան հայկական համագումար»-ին ժամանակ ըսած էր, որ Եւրոմիութեան անդամակցելու հարցով հանրաքուէ կայացնելու անհրաժեշտութիւն չի տեսներ, քանի որ «գիտէ ժողովուրդին կարծիքը»։
