Ռուսիոյ նախագահ Վլատիմիր Փութին յայտնեց, որ «Հարաւային Կովկասի մէջ կայուն խաղաղութեան հաստատումը կը բխի շրջանի բոլոր պետութիւններուն եւ ժողովուրդներուն բուն շահերէն»: Ան կը խօսէր Պաքու կատարած իր այցելութեան ընթացքին քննարկուած նիւթերուն մասին:
Իսկ Ռուսիոյ արտաքին գործերու նախարար Սերկէյ Լաւրով Հայաստանի իշխանութիւնը ամբաստանեց Սիւնիքի մարզով հաղորդակցութեան վերաբերեալ համաձայնագիրը խափանելու մէջ: Դիտել տալով, որ վարչապետ Նիկոլ Փաշինեան այդ մասին համաձայնագիր ստորագրած էր, Լաւրով հարց տուաւ, թէ այսօր ինչ է փոխուած դիրքորոշումին պատճառը:
Նոյն ծիրին մէջ, Ատրպէյճանի արտաքին գործերու նախարար Ճէյհուն Պայրամով յայտնեց, որ Պաքուն բաց է բանակցային հոլովոյթին համար՝ ըլլայ այդ ուղիղ երկկողմանի ձեւաչափով, կամ Ռուսիոյ միջնորդութեամբ: Նախարարը սակայն պահանջեց, որ «հայկական կողմը իր բոլոր պահանջները վերացնէ ոչ թէ խօսքով, այլ՝ իրաւական հիմնաւորուած ձեւով»: Անոր համաձայն, խաղաղութեան պայմանագիրը պէտք է վերացնէ ապագային երկիրներու միջեւ տարածքային խնդիրին վերադառնալու հնարաւոր բոլոր վտանգները:
