Միացեալ Նահանգներու նախագահ Ճօ Պայտըն կարծիք յայտնեց, որ տակաւին հնարաւորութիւն կայ վերջ տալու պատերազմին եւ յայտարարելու զինադադար, իսկ արտաքին գործերու նախարար Անթոնի Պլինքըն ահազանգեց, թէ բանակցային այս փուլը գուցէ ըլլայ զինադադար յայտարարելու վերջին առիթը:
Համաս շարժումը միւս կողմէ դժգոհեցաւ, թէ Կազայի մէջ զինադադար յայտարարելու բանակցութիւններուն նորագոյն առաջարկը կը համապատասխանէ Իսրայէլի վարչապետ Պենիամին Նեթանիահուի նախապայմաններուն, որ մասնաւորաբար կը մերժէ վերջնական զինադադարը եւ Կազայի բոլոր շրջաններէն ամբողջական նահանջը: Շարժումի բանբեր Ժիհատ Թահա վստահեցուց, որ Իրան ու Հըզպալլա իրաւունք ունին հակադարձելու իսրայէլեան ոճրագործութիւններուն: Խօսելով բանակցութիւններու ընթացքին մասին, Թահա կարծիք յայտնեց, որ անոնց հարցով դրականութիւն սփռելու նպատակն է մեղմել տարածաշրջանային լարուածութիւնը: Թահա սակայն բողոքեց, որ իսրայէլեան կողմը բանակցային իւրաքանչիւր փուլին կ’առաջադրէ նոր նախապայմաններ, պահանջելով ներկայութիւն ունենալ Կազա-Սինայի անապատ սահմանային 14 քիլոմեթրանոց Ֆիլատելֆիա ճակատին եւ Ռաֆահի անցակէտին վրայ, նաեւ վեթօ դնելով որոշ գերիներու ազատ արձակումին դէմ: «Մենք կը պահանջենք գործնական քայլեր, ոչ միայն խօսքեր», ըսաւ Թահա՝ անդրադառնալով համաձայնութեան յանգելու հնարաւորութիւններուն: Իսկ իսրայէլեան լրատուամիջոցներ երէկ գիշեր հաղորդեցին, որ բանագնացներու պատուիրակութիւնը ապարդիւն վերադարձած է Եգիպտոսէն՝ Ֆիլատելֆիա ճակատին հարցով համաձայնութեան չյանգելու լոյսին տակ: Ըստ տեղեկութիւններուն, Գահիրէ մերժած էր Թել Աւիւի պահանջը՝ սահմանային այդ հատուածին մէջ մնալու առնչութեամբ:
