Քանի մը օրուայ դադարէն ետք, իսրայէլեան ռազմական օդանաւերը երէկ առաւօտեան վերստին երկու անգամ ձայնի պատը խզեցին հարաւային զանազան շրջաններու, մայրաքաղաք Պէյրութի եւ Լեռնալիբանանի վերեւ՝ խաղաղ քաղաքացիները սարսափեցնելու նոր փորձով մը: Կարճ ժամանակ ետք, Արտաքին գործերու նախարարութիւնը յայտարարեց, թէ նախարար Ապտալլա Պու Հապիպի յանձնարարութեամբ, ՄԱԿ-ի մէջ Լիբանանի մնայուն պատուիրակութիւնը բողոք ներկայացուցած է ՄԱԿ-ի Ապահովութեան խորհուրդին՝ դատապարտելով իսրայէլեան ռազմական օդանաւերուն թռիչքները եւ ձայնի պատին խզումը, որ կ’ահաբեկէ քաղաքացիները՝ մասնաւորաբար երեխաները: Լիբանանեան բողոքին մէջ նշուեցաւ, որ Իսրայէլ շարունակաբար կը խախտէ 1701 բանաձեւը եւ միջազգային մարդասիրական բոլոր ուխտերը՝ հոգեկան ճնշում գործադրելով քաղաքացիներուն նկատմամբ:
