Առողջապահութեան նախարարութեան շտապ գործողութիւններու կեդրոնը հաղորդեց, որ երէկ առաւօտեան երկու մարդ մահացած է Լիբանանի հարաւարեւելեան Հուլա շրջանին ուղղութեամբ իսրայէլեան օդային հարուածի պատճառով: Իսկ երէկ երեկոյեան, իսրայէլեան անօդաչու սարք մը հրթիռ արձակելով ինքնաշարժ մը կործանեց հարաւային Տէյր Քանուն էլ Նահր գիւղի ճամբուն վրայ: Ինքնաշարժ մըն ալ թիրախաւորուեցաւ հարաւային Նաքուրայի ճամբուն վրայ: Կարճ ժամանակ ետք Հըզպալլա յայտարարեց, թէ իր անդամներէն «Ապպաս Մըլհէմ եւ Մոհամմատ Քատտուհ ինկած են Երուսաղէմի ճամբուն վրայ»:
Իսրայէլեան բանակի բանբերը իր կարգին նշեց, որ օդուժը Հըզպալլային պատկանող կառոյցներ ռմբակոծած է հարաւային Այթա Շաապ, Պէյթ Լէյֆ եւ Հուլա շրջաններուն մէջ: Ավիխայ Ատրահի յայտնեց նաեւ զինուորի մը մահը՝ Հըզպալլայի անօդաչու սարքերով յարձակումին պատճառով: Հըզպալլայի ռազմական լրատուութիւնը նախապէս յայտարարած էր, թէ որպէս հակադարձութիւն լիբանանեան գիւղերու թիրախաւորումին եւ աջակցութիւն՝ Կազային, այսօր առաւօտեան անօդաչու սարքերով, հրթիռներով եւ հրետանիով յարձակում գործած է իսրայէլեան բանակի շարք մը զօրամասերու եւ զինուորական կուտակումներու վրայ՝ կործանելով կառոյցներուն մէկ մասը եւ պատճառելով ծանր վնաս:
