Ուժանիւթի եւ ջուրի հարցերու նախարարի պաշտօնակատար Ուալիտ Ֆայյատ յայտնեց, որ ելեկտրամատակարարումի բարելաւումը զգալի պիտի ըլլայ յառաջիկայ շաբթուայ առաջին օրերէն սկսեալ՝ ելեկտրակայաններու ամբողջական գործարկումէն ետք: Վարչապետի պաշտօնակատար Նեժիպ Միքաթիի հետ տեսակցելէ ետք, Ֆայյատ վարչապետարանէն յայտարարեց, թէ արծարծած է ելեկտրականութեան նորագոյն ճգնաժամին պատճառներն ու մանրամասնութիւնները, նաեւ շնորհակալութիւն յայտնած է Միքաթիին, որ սատարած էր խնդիրի լուծումին՝ անձնական ջանքերով վառելանիւթ ապահովելով քարիւղային ենթակառոյցներէն, ուրկէ իրաւասութեան բացակայութեան պատճառով նախապէս չէին կրցած կայացնել համապատասխան որոշումները: Ֆայյատ բողոքեց, թէ պետական որոշ հաստատութիւններու մէջ կան որոշումներ կայացնելու ընթացակարգի եւ իրաւասութեան հարցեր, որոնք քաղաքացիներուն համար դուռ կը բանան յաւելեալ գլխացաւի: Ֆայյատ յիշեցուց, որ ամբողջական խաւարէն խուսափելու համար ինք առաջարկած էր վառելանիւթ փոխ առնել բանակի պահեստէն կամ քարիւղային ենթակառոյցէն, սակայն յայտնուած էին բարդոյթներ: Միքաթի իր կարգին յայտնեց, որ յուշագիր յղած է Քննադական կեդրոնական խորհուրդին՝ պահանջելով իսկոյն հետաքննել անցնող օրերուն ելեկտրամատակարարումի ամբղջական խափանումը եւ բացայայտել պատճառներն ու պատասխանատուները:
Իրաքի կառավարութեան բանբեր Պասէմ Աուատի հերքեց, թէ Պաղտատ կը դադրեցնէ Լիբանանին քարիւղ մատակարարել, յստակացնելով որ վառելանիւթի մատակարարումը կը դիմագրաւէ որոշ աշխատանքային դժուարութիւններ՝ մանաւանդ բեռնափոխադրութեան ոլորտին մէջ: «Ընդհակառակը, Իրան յանձնառու կը մնայ քարիւղային հարցով Լիբանանի հետ կնքուած համաձայնութեան: Մենք յանձնառու կը մնանք եղբայրական Լիբանանին օգնելու սկզբունքին», ըսաւ Աուատի՝ աւելցնելով, որ Լիբանանին կողքին կանգնիլը իրենց համար պարտականութիւն է: Բանբերը ապա հաւաստիացուց, որ քարիւղային հերթական բեռը շուտով պիտի ուղարկուի Լիբանան:
