Ազգային ազատ հոսանքի «Ուժեղ Լիբանանը» երեսփոխանական համախմբումի գլխաւոր անդամներէն երեսփոխան Իպրահիմ Քանաան երէկ մամլոյ ասուլիսով մը խօսեցաւ հոսանքի ներքին խնդիրներուն մասին: Խօսելով վերջերս հոսանքէն կատարուած վտարումներուն եւ հրաժարականներուն մասին, Քանաան առաջարկեց սառեցնել նշեալ բոլոր որոշումները եւ մէկ շաբաթ ժամանակ շնորհել՝ լուծելու խնդիրները, մանաւանդ հոսանքի որոշումներուն յանձնառու մնալու հարցը:
Քանաանի մամլոյ ասուլիսէն ժամեր առաջ, Ազգային ազատ հոսանքը որոշած էր սառեցնել երեսփոխանին անդամակցութիւնը իր Քաղաքական խորհուրդին:
Հոսանքի տեղեկատուական կեդրոնը զարմանք յայտնեց Քանաանի մամլոյ ասուլիսին առնչութեամբ եւ նշեց, որ «աւելի ճիշդ կ’ըլլար հաշտութեան մթնոլորտ ձեւաւորել Հոսանքին մէջ, լրատուական ցուցադրութիւններու փոխարէն»: Դիտել տալով, որ առնչակից երեսփոխանը մաս կը կազմէ Քաղաքական խորհուրդին, երեսփոխան Ժըպրան Պասիլի գլխաւորած կուսակցութիւնը յիշեցուց, որ Հոսանքին անդամները պէտք է յարգեն ներքին օրէնքները:
