Իսրայէլեան անօդաչու սարքերը երէկ ինքնաշարժ մը թիրախաւորեցին հարաւային Պարհաշիթ եւ Պէյթ Եահուն գիւղերուն միջեւ: Առողջապահութեան նախարարութեան արտակարգ իրավիճակներու գրասենեակը աւելի ուշ յայտարարեց, թէ Պարհաշիթի մէջ ինքնաշարժի թիրախաւորումէն մահացած է երկու մարդ:
Հարաւէն տեղահանուածներուն օգնելու նպատակով, կրթութեան եւ բարձագոյն ուսումի նախարարի պաշտօնակատար Ապպաս Հալապի յայտնեց, որ իրենք կարգ մը վարժարաններ յատկացուցած են տեղահանուածներուն եւ կ’ուսումնասիրեն որպէս ժամանակաւոր ապաստան անոնց պիտանելիութիւնը՝ պատերազմի բռնկումի պարագային:
Փաղանագաւոր կուսակցութեան քաղաքական գրասենեակը դատապարտեց «մերժելի պատերազմի համար լիբանանեան բոլոր շրջանները ապրող վահանի վերածելու քաղաքականութիւնը»: Դիտել տալով, որ միջազգային ընտանիքը կը մերժէ նիւթապէս օգնել հարաւէն տեղահանուածներուն յատկացուող եւ կործանուած կառոյցները վերակառուցելու ծախսերուն, կուսակցութեան առաջնորդ Սամի Ժմայէլ դիտել տուաւ, որ այս անախորժ վիճակին առաջին պատասխանատուն Հըզպալլան է, ապա՝ Լիբանանի գործող կառավարութիւնը, որ հրաժարած է իր պարտականութիւններէն եւ հրապարակը յանձնած է Հըզպալլային:
