Չորեքշաբթի, 7 Օգոստոս 2024-ի երեկոյեան ժամը 8:00-ին, «Հ.Մ.Մ.-Պէյրութ»ի ակումբին մէջ, Հ.Մ.Մ. Պէյրութի եւ Անթիլիասի զոյգ վարչութուններուն համագործակցութեամբ տեղի ունեցաւ տարիքային մարզիկներու ստորագրութիւն, ներկայութեամբ «Հ.Մ.Մ.-Պէյրութ»ի ատենապետ Ընկ. Փօլ Մուղալեանի, «Հ.Մ.Մ.-Պէյրութ»ի ֆութպոլի դիւանապետ ընկ. Պենոն Տէօվլէթեանի եւ «Հ.Մ.Մ.-Անթիլիաս»ի ֆութպոլի դիւանապետ ընկ. Յովիկ Նագգաշեանի:
Հ.Մ.Մ.-ի անունով միջոցառման բացումը կատարեց ընկ. Լութֆիկ Կոտալազեանը՝ բարի գալուստ մաղթելով մարզիկներուն եւ ծնողներուն, որոնք այսուհետեւ մաս պիտի կազմեն Հ.Մ.Մ.-ի մեծ ընտանիքին: Ան ծնողներուն վստահեցուց, որ իրենց զաւակները մաս պիտի կազմեն փայլուն դրուագներով անցեալ ունեցող Հ.Մ.Մ.-ին, յաջողութիւն մաղթելով անոնց մարզական կեանքին մէջ:
Ապա խօսք առաւ Հ.Մ.Մ.-ի ֆութպոլի Ակադեմիայի եւ տարիքային խումբի մարզիչ Ճօ Ապտալլան: Ան խոստացաւ, որ Լիբանանի ախոյեանութեան մասնակցութեան մէջ անոնք մեծ փորձառութիւն ձեռք պիտի բերեն եւ լաւ արդիւնքներով դուրս պիտի գան։
Վերջապէս, Հ.Մ.Մ.-ի ֆութպոլի տարիքային խումբի փոխմարզիչ եւ պատասխանատու ընկ. Յարութ Պասմաճեան հրաւիրեց 15 մարզիկները՝ ստորագրելու, որպէսզի մասնակցին Լիբանանի տարիքային յառաջիկայ ախոյեանութեան:
