Երիտասարդութեան միջազգային օրուան առիթով, 12 Օգոստոսին, ՀՀ Պաշտպանութեան նախարարութեան վարչական համալիրին մէջ, պաշտպանութեան նախարար Սուրէն Պապիկեան հիւրընկալած է ռազմաուսումնական հաստատութիւններու, քաղաքացիական համալսարաններու ուսանողներ, շարք մը երիտասարդ սպաներ եւ սփիւռքահայ երիտասարդներ։
Ողջունելով եւ շնորհաւորելով երիտասարդները, ՀՀ պաշտպանութեան նախարար Սուրէն Պապիկեանը կարեւորած է երիտասարդութեան դերը եւ բնականոն ու սահուն սերնդափոխութեան անհրաժեշտութիւնը պետութեան կայուն զարգացման, յառաջընթացի, այդ շարքին նաեւ Զինուած ուժերու զարգացման տեսլականը կեանքի կոչելու գործին մէջ։
ՀՀ պաշտպանական գերատեսչութեան ղեկավարը անդրադարձած է Զինուած ուժերուն մէջ սկիզբ առած արմատական բարեփոխումներուն, վերջին տարիներուն կատարուած լայնածաւալ աշխատանքներուն, այդ շարքին՝ ճարտարպետական աշխատանքներուն, բնակարանային ապահովման ծրագրին, ինչպէս նաեւ ներդրուած շարք մը հեռանկարային ծրագրերու, որոնց նպատակն է որակական նոր, ամուր հիմքեր ստեղծել արհեստավարժ բանակ ունենալու համար՝ զինուած ուժերը համալրելով երիտասարդ, պատրաստուած ու բանիմաց մասնագէտներով։ Այս ծիրին մէջ, Սուրէն Պապիկեան խօսած է «Պաշտպան հայրենեաց» ծրագրին մասին, որ լայն հնարաւորութիւններ կ’ընձեռէ երիտասարդներուն՝ ժամկէտային ծառայութիւնը ընկերային արտօնութիւններու շօշափելի փաթեթով եւ բարձր աշխատավարձով փոխարինելու հնգամեայ պայմանագրային ծառայութեամբ։ Որպէս ընկերային կարեւոր բաղադրիչ՝ անդրադարձ կատարուած է նաեւ սպաները քննութեան մասնակից դարձնելու շարունակական գործընթացին։
Սուրէն Պապիկեան իր խօսքին մէջ կարեւորած է նաեւ ռազմական կրթութեան ոլորտին մէջ արդէն իսկ սկիզբ առած եւ ընթացիկ բարեփոխումները, ռազմատեխնիկական համագործակցութեան բազմազանեցուած ծրագրերու կեանքի կոչումը, ՀՀ բանակին մէջ կանանց դերակատարութեան բարձրացման ուղղուած ծրագրերու իրականացումը, կրթութեան որակի կտրուկ բարձրացումը: Այս բոլորին վերջնարդիւնքը մէկն է՝ ունենալ մարտունակ եւ ժամանակակից մարտահրաւէրներուն պատրաստ զինուած ուժեր՝ ունակ բարձր մակարդակով կատարելու առաջադրուած խնդիրները։
