Լրատուութեան զարգացման ատրպէյճանական գործակալութիւնը, մեկնաբանելով շարք մը լրատուամիջոցներու լուրերը, թէ Իսրայէլը արգիլած է իր զինուորականներուն մնալ Ատրպէյճանի եւ Վրաստանի մէջ, յայտարարած է, որ երկրի տարածքին օտարերկրեայ պետութիւններու ռազմական զօրախումբ չկայ։
Յիշեցնենք, որ Իսրայէլի «Kan» պետական հեռուստառատիոընկերութիւնը հաղորդած է, որ իսրայէլեան բանակը, Իրանի սպառնալիքի լոյսին ներքոյ, արգիլած է իր զինուորականներուն գտնուիլ Ատրպէյճանի եւ Վրաստանի մէջ։ Ըստ այդ տուեալներուն՝ զինուորական ծառայութեան մէջ գտնուող իսրայէլացիները, որոնք ինչ-որ պատճառներով այժմ կը գտնուին Հարաւային Կովկասի այս երկու հանրապետութիւններուն մէջ, բանակի ղեկավարութեան հրամանով պարտաւոր են անյապաղ լքել այդ երկրները եւ վերադառնալ Իսրայէլ։
Ի պատասխան ասոր՝ Լրատուութեան զարգացման ատրպէյճանական գործակալութիւնը նշած է, որ որոշ արտասահմանեան լրատուամիջոցներ, յենելով «ոչ-յուսալի աղբիւրներու վրայ», ապատեղեկատուութիւն կը տարածեն Ատրպէյճանի մասին, ինչ որ «մոլորութեան մէջ կը դնէ ինչպէս տեղական, այնպէս ալ արտերկրեայ լսարանը»։
«Կը յայտարարենք, որ Ատրպէյճանի տարածքին չկայ որեւէ օտարերկրեայ պետութեան ռազմական զօրախումբ։ Խստօրէն կը դատապարտենք տեղեկատուական խաղերը, որոնք հիմնուած են այս առումով կեղծ տեղեկութիւններու վրայ»,- ըսուած է յայտարարութեան մէջ:
