Մեկնարկած է Յունիս 12-ին Բաղրամեան-Դեմիրճեան խաչմերուկին տեղի ունեցած բախումներուն գործով դատավարութիւնը: Նիստին ներկայ էին մեղադրեալներուն հարազատները, աջակիցները։
Այս գործով մեղադրանք առաջադրուած է 16 ցուցարարի: Անոնցմէ 15-ը կը մեղադրուին խուլիկանութեան յօդուածով ու մէկը՝ զանգուածային անկարգութեան։
Չորս մեղադրեալու նկատմամբ, ինչպէս փոխանցած էր փաստաբան Ռուբէն Մելիքեանը, խափանման միջոց ընտրուած է բանտային, ութի նկատմամբ տնային կալանքը, երկուքի նկատմամբ վարչական հսկողութիւնը ու եւս երկուի՝ բացակայելու արգելքը:
Դատարանը մինչ բուն գործի քննույեան անցնիլը նախ անդրադարձաւ մեղադրեալներուն նկատմամբ ընտրուած խափանման միջոցներու հարցին։ Հանրային մեղադրողները կը համարեն, որ գործի պատշաճ քննութեան համար անոնք պէտք է պահպանուին, իսկ պաշտպանական կողմը, ներկայացնելով իր փաստարկները, կ’առաջարկէ զանոնք փոխել, որոշ պարագաներու ալ՝ վերացնել:
Դատարանի բակին մէջ էր ընդդիմադիր շարժման առաջնորդ Բագրատ արքեպիսկոպոս Գալստանեանը: Բագրատ սրբազանը պնդեց, որ այս գործը ամբողջութեամբ քաղաքական է։
Յունիս 12-ին վարչապետին հրաժարականը պահանջող ընդդիմադիրներու հաւաքը ոստիկանութիւնը ցրած էր յատուկ միջոցներու եւ ուժի կիրառմամբ, ինչի հետեւանքով աւելի քան 100 մարդ տուժած էր, անոնցմէ 57-ը, ըստ Առողջապահութեան նախարարութեան, ստացած էին բեկորային վնասուածք։ Ոստիկանական գործողութիւնները քննելու համար Յունիս 14-ին քրէական գործ յարուցուած էր, սակայն, դեռ ոեւէ մեղադրեալ ոստիկան չկայ։
