Վարչապետի պաշտօնակատար Նեժիպ Միքաթի յայտնեց, որ առնչակից նախարարութիւնները կը համագործակցին միջազգային հաստատութիւններուն եւ լիբանանեան քաղաքացիական շրջանակի կազմակերպութիւններուն հետ՝ պատրաստելու համար կառավարութեան մշակած արտակարգ դրութեան ծրագիրը, որ գործադրութեան պիտի դրուի Լիբանանի դէմ իսրայէլեան պատերազմի շղթայազերծումի պարագային: Վարչապետարանին մէջ ունեցած տեսակցութիւններուն ընթացքին, Միքաթի հաւաստիացուց, որ դիւանագիտական խորհրդակցութիւնները բազմացած են թէ՛ հարաւի մէջ իսրայէլեան ոտնձգութիւնները դադրեցնելու եւ 1701 բանաձեւը գործադրելու, թէ՛ Կազայի մէջ զինադադար յայտարարելու համար:
