Միացեալ Նահանգներու պաշտպանութեան նախարար Լոյտ Ուսթին իր իսրայէլացի պաշտօնակից Կալանթին տեղեկացուց, որ հրահանգած է «Աբրահամ Լինքըլն» օդանաւակիրն ու ընկերակից մարտանաւերը անյապաղ տեղակայել Միջին Արեւելքի մէջ: Իսկ Ֆրանսայի, Բրիտանիոյ եւ Գերմանիոյ ղեկավարները միացեալ հաղորդագրութեամբ մը կոչ ուղղեցին յաւելեալ աշխատանք տանելու՝ զինադադար յայտարարելու Կազայի մէջ եւ ազատ արձակելու գերիները: «Պատերազմը պէտք է հիմա՛ աւարտի», նշեցին Փարիզ, Լոնտոն եւ Պերլին, Իրանէն ու անոր դաշնակիցներէն պահանջելով զերծ մնալ տարածաշրջանային ճգնաժամը խորացրող արարքներէ: Հաղորդագրութիւնը շեշտեց նաեւ Կազայի պաշարուած բնակչութեան մարդասիրական անխափան օգնութիւն փոխանցելու անհրաժեշտութիւնը: Եւրոմիութեան արտաքին եւ անվտանգութեան քաղաքականութեան գերագոյն ներկայացուցիչ Ժոզէփ Պորել, իր կարգին, կոչ ուղղեց պատժամիջոցներ սահմանելու իսրայէլեան ծայրայեղ աջը ներկայացնող զոյգ նախարարներ Սմոթրիչի եւ Պեն Ղաֆիրի նկատմամբ՝ Կազայի ժողովուրդին սպանդն ու տեղահանումը արդարացուած համարող յայտարարութիւններուն համար:
Այսուհանդերձ, միջազգային այս աշխուժութիւնը մնաց մաղթանքներու եւ կոչերու ծիրին մէջ ու յայտարարութիւններու սահմանը հատելով չանցաւ գործնական որեւէ քայլի:
