Կազայի Լիբանանի սահմանային պատերազմներուն լոյսին տակ, քաղաքական տարակարծութիւնները խորացած են արդէն իսկ հակասութիւններով լեցուն իսրայէլեան կառավարութեան մէջ, միշտ նոյն «հերոսներով»:
Վարչապետ Պենիամին Նեթանիահու մեկնաբանեց Կալանթի վերոյիշեալ խօսքերը եւ դիտել տուաւ, որ «երբ Կալանթ կ’որդեգրէ հակաիսրայէլեան ուղերձ մը, ապա վնաս կը հասցնէ գերիներու հարցով համաձայնութեան յանգելու փորձերուն», ըսաւ Նեթանիահու: Անոր համաձայն, Կալանթ պէտք է յարձակէր Համասի նոր ղեկավար Եահիա Սընուարի վրայ, որ կը մերժէ պատուիրակութիւն ուղարկել բանակցութեան եւ կը խափանէ համաձայնելու հնարաւորութիւնը: «Իսրայէլ միայն մէկ ընտրանք ունի՝ յաղթանակի ընտրանքը», շեշտեց վարչապետը՝ աւելցնելով, որ իր ցուցմունքները պարտադիր են բոլորին համար՝ ներառեալ Կալանթը: Ազգային անվտանգութեան նախարար Պեն Ղաֆիր, իր կարգին, Նեթանիահուին տեղեկացուց, թէ պիտի հրաժարի կառավարութենէն, եթէ գերիներու հարցով որդեգրուի ներկայիս առաջարկուած նախաձեռնութիւնը:
