15 Յուլիսին նախատեսուած գերիներու փոխանակումի բանակցութիւններու հերթական փուլէն ընդամէնը երեք օր առաջ, վերստին բազմացած են Իսրայէլի դէմ Իրանի եւ դիմադրութեան ճակատի կազմակերպութիւններուն՝ ներառեալ Հըզպալլային ենթադրեալ յարձակումի կանխատեսումները, ինչպէս լիբանանեան ու արաբական, այնպէս ալ իսրայէլեան լրատուամիջոցներուն եւ քաղաքական շրջանակներուն մէջ: Այս առումով, իսրայէլեան լրատուամիջոցներ հաղորդեցին, որ բանակը զինուորական ծառայութեան մէջ գտնուողներուն արգիլած է մնալ Ատրպէյճանի կամ Վրաստանի մէջ՝ Իրանէն հաւանական գործողութեան մտավախութեամբ:
Իսրայէլի պաշտպանութեան նախարար Եոաւ Կալանթ երէկ հանդէս եկաւ յատկանշական յայտարարութեամբ, ուր գերիներուն վերադարձի գործարքին ձախողութեան պատասխանատուն համարեց իսրայէլեան կողմը: Նախարարը անիմաստ որակեց Համասի նկատմամբ ամբողջական յաղթանակի մասին խօսքերը եւ ահազանգեց, թէ իրենք կը բոլորեն լարուած օրեր, որովհետեւ «որեւէ պահու կրնան իրականանալ Թեհրանէն եւ Պէյրութէն հնչող սպառնալիքները»: Ըստ Կալանթի, իսրայէլեան բանակը ամրապնդած է պաշտպանութիւնը, նաեւ քննարկած է յարձակողական ընտրանքները՝ հակադարձնելու համար գալիք հաւանական հարուածին, առաջին նպատակ ունենալով պաշտպանել քաղաքացիները:
