Լիբանանեան մարզական կեանքին մէջ մեծ եւ իւրայատուկ է ՀԲԸՄ-ՀԵԸ-ի պասքէթպոլի աւանդը, որ կը հատէ տղաներու եւ աղջիկներու առաջին դասակարգերուն շրջագիծը, հասնելով բոլոր դասակարգեր եւ տարիքային շերտեր, ուր մրցաշարքերուն հետեւողական մասնակցութիւն կը բերեն ՀԲԸՄ-ՀԵԸ Անդրանիկ Պէյրութ, Սին էլ Ֆիլ, Անթիլիաս եւ Զահլէ խումբերը:
ՀԲԸՄ-ՀԵԸ Անդրանիկ Զահլէի տղոց խումբը գոհացուցիչ արդիւնքներով հանդէս եկաւ 2024-ի Լիբանանի պասքէթպոլի 4-րդ դասակարգի ախոյեանութեան մրցումներուն, գլխաւորութեամբ մարզիչ Ժան-Ժագ Յակոբեանի եւ անմիջական վերահսկողութեամբ վարչական պատասխանատու Վազգէն Յովհաննէսեանի: Առ ի գնահատանք մարզիչին ու մարզիկներուն տարած արդիւնաւէտ աշխատանքին, ՀԲԸՄ-ՀԵԸ Անդրանիկ Զահլէի Տեղական վարչութիւնը Զահլէի մէջ ընթրիք մը սարքեց Ուրբաթ, 2 Օգոստոս 2024-ին, արժեւորելու եզրափակուած ախոյեանութիւնը, պատուելու մարզիչն ու մարզիկները եւ երախտագիտութիւն յայտնելու անոնց՝ ներդրուած ջանքերուն համար:
Ներկայութեամբ ՀԲԸՄ-ՀԵԸ Կեդրոնական վարչութեան ատենապետ Վիգէն Չերչեանին, խումբին անդամները եւ վարչական պատասխանտուները նախ այցելեցին Զահլէի ՀԲԸՄ-ՀԵԸ Ալեք Մանուկեան կեդրոն, ուր Միութեան Զահլէի Տեղական վարչութեան ատենապետ Ճորճ Տէկիրմէնճեանի առաջնորդութեամբ ծանօթացան համալիրին եւ այնտեղ իրականացուող աշխատանքներուն, ապա ուղղուեցան ճաշարան, ուր ընթրեցին, գնահատանքի խօսքեր փոխանակեցին եւ զիրար շնորհաւորեցին՝ արձանագրուած դրական արդիւնքներուն համար, վճռելով աւելի լաւ պատրաստուիլ գալիք ախոյեանութեան եւ առաջին դասակարգին նման այստեղ եւս բարձր պահել Միութեան անունը՝ ինչպէս Պէյրութի, այնպէս ալ լիբանանահայ համայնքի պատմութեան մայր կեդրոններէն Զահլէի մարզաշխարհին մէջ:
ՀԲԸՄ-ՀԵԸ Մամլոյ եւ Տեղեկատուական Գրասենեակ
