Կը սպասուի, որ ՄԱԿ-ի Ապահովութեան խորհուրդը արտակարգ նիստ մը գումարէ վաղը՝ քննարկելու համար Կազայի Տարաժ թաղամասին մէջ տեղահանուածներ հիւրընկալող Թապիհին վարժարանին ռմբակոծումը, արեւածագի աղօթքի պահուն, որ պատճառեց շուրջ հարիւր զոհ եւ բազմաթիւ վիրաւորներ: Կազայի Քաղաքացիական անվտանգութեան ծառայութեան համաձայն, իսրայէլեան հարուածը այնքան ուժեղ էր, որ շատ դժուար եղած է վարժարանին եւ մօտակայ փողոցներուն վրայ գտնել զոհերու ամբողջական մարմիններ: Այս առումով, Լիբանանի Արտաքին գործերու նախարարութիւնը դատապարտեց իսրայէլեան ոճիրները եւ նշեց, որ անոնք կը բացայայտեն պատերազմը շարունակելու Թել Աւիւի մտադրութիւնը:
