Իրանի իսլամական յեղափոխութեան գերագոյն առաջնորդ այաթոլլա Ալի Խամինէիի խորհրդական Ալի Շամխանի յայտնեց, որ «օրինական, լրատուական եւ դիւանագիտական պայմանները բիւրեղացած են արժանի պատիժ տալու Իսրայէլին, որ կը հասկնայ միայն ուժի լեզուն»: Իսկ Իրանի արտաքին գործերու նախարարի ժամանակաւոր գործակատար Ալի Պաքիրի Քենի հաւաստիացուց, որ «Իսրայէլ պիտի վճարէ Թեհրանի մէջ «Համաս»ի ղեկավար Իսմայէլ Հանիէն ահաբեկելուն գինը»: Իր պելճիքացի պաշտօնակիցին հետ ունեցած հեռաձայնային հաղորդակցութեան ընթացքին, իրանցի նախարարի գործակատարը շեշտեց, որ Իրան օրինական եւ վճռորոշ հակահարուած պիտի տայ Իսրայէլին՝ հիմնուելով գերիշխանութեան եւ հողերու անվտանգութեան պահպանումի սկզբունքներուն վրայ եւ յարգելով միջազգային իրաւունքն ու օրինականութիւնը:
Իսրայէլի պաշտպանութեան նախարար Եոաւ Կալանթ ահազանցեց, որ Իրանն ու Հըզպալլան կը պատրաստուին Իսրայէլին վնաս հասցնելու այնպիսի միջոցներով, որ նախապէս երբեք չեն գործածած: Ան ամերիկացի արտաքին գործերու նախարար Անթոնի Պլինքընի հետ զրոյցին ընթացքին յոյս յայտնեց, որ Իրանի ճակատը չընդարձակէ պատերազմը: Իսկ Պլինքըն զգուշացուց, թէ տարածաշրջանային մագլցումը չի բխիր որեւէ կողմի շահերէն: Ան ընդգծեց Միջին Արեւելքի վիճակը հանդարտեցնելու անհրաժեշտութիւնը, միաժամանակ Ուաշինկթընի անփոփոխ յանձնառութիւնը յայտնելով Իսրայէլի անվտանգութեան: Այս առումով, CNN հաղորդեց, որ ամերիկեան վարչակազմը կը պատրաստուի 3,5 միլիառ տոլարի արժողութեամբ զէնք ու զինամթերք տրամադրելու Իսրայէլին: Իսրայէլի մէջ ամերիկացի դեսպանը իր կարգին նշեց, որ յառաջիկայ օրերը վճռորոշ պիտի ըլլան տարածաշրջանային հակամարտութիւնը կանխելու առումով, որովհետեւ որեւէ կողմ շահ չունի այդ պատերազմէն:
