Իրանի իշխանութիւնները կը շարունակեն անուղղակիօրէն ընդդիմանալ տարածաշրջանային հաղորդակցութիւններուն վերաբերող ատրպէյճանական ծրագրերուն: Հայաստանի մէջ Իրանի դեսպան Մեհտի Սոպհանի յստակացուց, որ իրենք կ’աջակցին հաղորդակցութիւններու ապաշրջափակումին, պայմանաւ որ ենթակայ ըլլայ Հայաստանի ինքնիշխանութեան: Դիտել տալով, որ ապաշրջափակումի պարագային երթեւեկութիւնը պիտի աշխուժանայ, դեսպանը շեշտեց, որ այս պէտք է ըլլայ փոխադարձ պայմանաւորուածութեամբ եւ համաձայնութեամբ՝ աւելի մօտենալու համար կայուն խաղաղութեան, յօգուտ տարածաշրջանի ժողովուրդներուն:
Յիշեցնենք, որ աւելի քան երկու տարուայ բանակցութիւններէն ետք Երեւան պաշտօնապէս յայտարարեց, թէ Պաքուի հետ փոխադարձ համաձայնութեամբ որոշուած է խաղաղութեան համաձայնագրի նախագիծէն դուրս բերել տարածաշրջանային հաղորդակցութիւններու ապաշրջափակումին վերաբերող յօդուածը: Այլ խօսքով, Ատրպէյճանի պահանջած «Զանգեզուրի միջանցքին» վերաբերող քննարկումները առայժմ կը յետաձգուին, առիթ ընծայելով աւելի հրատապ խնդիրներու լուծումին:
