Եւրոմիութեան արտաքին յարաբրերութիւններու հարցերով խօսնակ Փեթեր Սթանօ յստակացուց, որ Հայաստանի հետ եւրոպական բանակցութիւնները որեւէ կապ չունին անդամակցութեան թեկնածութեան հնարաւորութիւններուն հետ: «Ազատութիւն» ռատիօկայանին տրուած հարցազրոյցի մը մէջ Սթանօ բացատրեց, որ խորհրդակցութիւնները այժմ կը կեդրոնանան գործընկերութեան օրակարգին վրայ, որպէսզի կարելի ըլլայ եզրակացնել, թէ իւրաքանչիւր կողմ որքան հեռու երթալու պատրաստ է: Սթանոյի համաձայն, այս աշխատանքը կը տարուի երկկողմանի յարաբերութիւնները եւ համագործակցութեան շրջանակը թարմացնելու համար՝ հիմնուելով փոխադարձ հետաքրքրութիւն ներկայացնող ոլորտներու վրայ: « Եթէ տեսնենք, որ աւելի խոր համագործակցելու պատրաստակամութիւն կայ, ապա մենք կ’արձագանգենք այդ քայլին», բացատրեց Սթանօ՝ աւելցնելով, որ ծրագրերը կը հիմնուին քաղաքական բարեփոխումներուն, տնտեսական զարգացումին եւ փոխադարձ համագործակցութեան վրայ:
