Իրանի յեղափոխական պահակագունդի «Երուսաղէմ» զօրախումբի հրամանատար Իսմայէլ Քաանի պատգամ յղեց «Համաս»ի քաղաքական գրասենեակի նորընտիր նախագահ Եահիա Սընուարին, որուն մէջ վստահեցուց, որ Իրան պիտի լուծէ իր հողին վրայ ահաբեկեկուած Իսմայէլ Հանիէի հոսած արեան վրէժը: Քաանի նաեւ հանգստութիւն յայտնեց, որ «Համաս» իր դրօշը յանձնած է գետնի վրայ առաւել ազդեցիկ ղեկավարներէն Սընուարին: Իսկ Հըզպալլայի երեսփոխաններէն Հասան Իզզըտին վստահեցուց, որ հակադարձութիւնը պիտի գայ Իրանէն, Լիբանանէն, Եմէնէն կամ Իրաքէն, որովհետեւ Իսրայէլ փորձած է հատել կարմիր գիծերը:
Միւս կողմէ, իսրայէլացի զինուորական պատասխանատու մը յայտնեց, որ Թել Աւիւ կը համագործակցի Փենթակոնի հետ՝ հակադարձելու համար Իրանի եւ Հըզպալլայի սպասուած հարուածներուն: «Մենք պատերազմի ընդարձակումէն կամ սրումէն շահ չունինք, սակայն կարմիր գիծ կը համարենք մեր քաղաքացիներուն թիրախաւորումը», ամերիկեան «ABC»-ին ըսաւ իսրայէլացի պատասխանատուն, մերժելով բացայայտել իր ինքնութինը:
